Heta nika bi desan merkez û baregehê artêşa tirke û îstîxbaratê MÎTî Başûrê Kurdîstanî de bi hawayêkê fermîyî estê û her ke şino bi hemkarîya PDKyî nê merkezî zêdîyayî.

Berê sînorî yê Xabûrî ra ver bi rojhelatê Batûfa, Barmernê, Amedîyê, Dêralûk û Şêladizê kampê artêşe û îstîxbaratê dewleta tirke estê. Ma bala xo bidê detayanê înan ser:

-Armancê kampanê Batûfa, Barmarnê û Amedîyê hem kontorlê herêmanê Heftanînî û Metîna yo hem zî hêrişêkê lezabezî de xebitnayîşê înan o. Armancê kampa sînorî ya Kanîmasî zî gefwendişê herêma Heftanînî yo.

-Bi rayîrê kampanê Amedîyê, Dêrelûk û Şêladizê yeno waştene ke herêmê Zap û Zagrosî bêrê kontrolkerdene.

-Bi kampa Dêralûkî yeno armanckerdene ke têkilîya Zap û Garî bêra birnayene.

-Sînorê Metîna de qereqolê Deştan, Karataş, Tepê Sor, Mehmetcîk Tepesî, Kanîmasî, Aşûtê, Zavite, Koprullu, Serbesta, Aroşe û Elemine estê.

-Serê sînorê Zapî de merkezê leşkerî yê sînorî yê Alaya Çelê, Girê, Şikêr, Sîvrîtepe, Serê Sêvê, tabûrê topan ê Êrîşê, qereqolê Bilican, Xantepe, Ertûş û girên Kale, Koordîne, Elîşêrî estê.

-Dêralûkî ra ver bi başûrrojhelatê Başûrê Kurdîstanî herêmanê Barzan, Mêrgesor û Soranî de kampî estê.

-Herêma Soranî ver bi vakurî  serê DFeşta Hêlê ra merdimî resenê Sidêka. Tîya de kampê Xinêrê, Xakurkê û Kelaşînî estê ke nê xetî sînorê fermî yê Tirkîya, Îran û Iraqî estê.

-Herêmanê  Sengeser, Ranya û Qeladizê de armanco bingeyî hêrişê vera Qendîlî yê.

-Herêma Cîloyî yê vakurê herêmanê Xinêr û Xakûrkê de qereqolê Oremar û Şitazinê, sînorê Avaşînî de qereqolê  Bêsosin, Herkî, Girê Nereze, Bezele û Barokê, Xakurkê de zî qereqol û baregehê Xapiskê, Harûna û Girê Konserve estê.

Fîyaskoyê Teberê Sînorî

Heta nika dewleta tirke zaf reyan bi bahaneya Têgêrayîşê Azadîye yê Kurdîstanî xîret kerd ke Başûrê Kurdîstanî îşxal bikera û verê destkewteyanê kurdan bigêra. 

-Dewleta tirke reya verêne 25ê gulana 1983î de Başûr de dest pê operasyonê îşxalî kerd. Nê operasyonan de artêşqa tirke qasê 7 kîlometreyan sînorê vakurî û başûrê Kurdîstanî derbaz kerd. Labelê bênetîce agêraye.

-Dewleta tirke 27ê gulana 1984î de bi nameyê 'Sicak Takîp Operasyonu' reyna operasyonêk da destpêkerdene. No operasyon zî bênetîce qedîya.

-15ê tebaxa 1986î de reyna operasyonêkê îşxalî yê artêşa tirke dest pêkerd û bênetîce qedîya. 

-4ê adara 1987î artêşa tirke xîret kerd ke Başûr îşxal bikera û heman roje neçare mende ke abigêra.

Hêzê PDKyî beşdarê operasyonanê artêşa tirke bîyî

-5ê teşrîna verêne ya 1992î de vera Têgêrayîşê Azadîye artêşa tirke operasyonêk da destpêkerdene. Pêşmergeyî tewrê nê operasyonî bîyî û vera gerîlayan şer kerd. 

-Reyna 21ê adara 1995î-2ê gulana 1995î de artêşa tirke vera gerîlayan operasyonê 'Çelik Hareketi' da destpêkerdene.  Pêşmergeyê PDKyî bi hawayêkê fermî tewrê nê operasyonî bîyî. No operasyon zî nênetîce qedîya.

-25ê êlula 1997-15ê teşrîna verêne ya 1997î de artêşa tirke bi nameyê 'Şafak' vera gerîlayan reyna operasyonêk da destpêkerdene. Hêzanê PDKyî nê operasyonî de zî vera gerîlayan şer kerd.

-Nîsana 1998-gulana 1998î de pêşmergeyî vera gerîlayan tewrê operasyonê artêşa tirke yê bi nameyê 'Muratî' bîyî.

-Artêşa tirke PDKyî reyde 4ê gulana 2000î de hêrişê Heftanînî kerd û neçare mende ke çar rojan ra dima xo apey bigêra.

Nê operasyonan ra dima Serekê PDKyî Mesûd Barzanîyî vatbi ke 'Heta ke ez weş ba nêverdena ke kurdî vera yewbînan şer bikerê.' La operasyonanê tirkan tim dewam kerd û PDK vera nînan bêveng mend. Operasyonê qirkerdiş û çinkerdişî yê artêşa tirke hema zî dewam kenê.

Nê mîyanî de kanûna 2007î de, 21ê sibata 2008î de, 17ê tebaxa 2011î de, 24ê temmuza 2015î de, 11ê tebaxa 2015î de artêşa tirke reyna hêrişê Başûrê Kurdîstanî kerd û sayê xoverdayîşê gerîlayan ra bênetîce agêraye.

28ê gulana 2019î de pê paştdayîşê PDKyî artêşa tirke vera gerîlayan operasyonê 'Pençe' da destpêkerdene. No operasyon hema zî dewam keno û gerîlayî her roje derbanê giranan danê dişmenî ro.

15ê hezîrana 2020î de bi hawayêkê hemwextî vera Herêmanê Pawitişî yê Medya, Şingal û Mexmûrî hêrişê hewayî ameyî kerdene. 

Ewro Heftanîn, Xakûrkê û Herêmanê Pawitişî yê Medya de têkoşînê gerîlayan dewam keno.

Nê rojan de artêşa tirke xîret kena ke bi hemkarîya PDKyî waranê gerîlayan ê sey Zînî Wertê, Garî de gormeyê gerîlayan bigêra. No zî sey şerê kurdan ê vera kurdan yeno ercnayene û seba ke birakujîyêke nêqewima xîretê pîlî yenê kerdene. La PDK hema zî bira şerî de isrardar o.