Gerîlayanê HPGyî derheqê hêrişê îşxalî yê dewleta tirke û têkoşînê gerîlayan de ANFyî rê qisey kerd.

Gerîlayan ra Zerdeşt Zinarî bale ante têkoşînê pîlî yê gerîlayan ser û vat: ''Tarîx de têkoşîno winayên nêame vînayene. Artêşa îşxalkere bi çekanê kîmyewîyan hêriş kena. Wa her kes bizano ke vera nê hêrişan hêz û  îmkanê ma zî estê ke ma bi metodanê cîya cîyayan têkoşîn bikerê. Ganî şarê ma zafêr tekoşîn bikero ke bêvengîya komelê mîyanneteweyî yê vera çekanê kîmyewîyan bişikno. Artêşa tirke ya îşxalkere semedê qedînayîşê ma çîyo ke destê ci ra yeno kena. Bêvengîya vera çekanê kîmyewîyan yena manaya hemkarî. Herêmê Pawitişî yê Medya de xeylêk herêmî pê çekanê kîmyewîyan ameyî talankerdene.  Bi des hezaran darî yenê birnayene la vengê çewî nêvejîyeno. Kurdîstan de xoza yena çînkerdene. Dişmen se keno wa bikero do meeşko têkoşînê ma bişikno. Ma do vera hêrişanê wehşîyan û hemkarîya mîyanneteweyîye têkoşînî pîlêr bikerê. Ma do vera sîstemê hêrişkarî têkoşîn bikerê û şarê kurdî bipawê. Ganî şarê ma zî her ca de têkoşînî pîlêr bikero. Şarê kurdî bertengê azadîye de yo.''

Aram Hêvî zî vat: ''Gerîlayî Vakur û Başûrê Kurdîstanî de şerê xurtî rayra benê. Vakur de xeylêk operasyonî ameyî astengkerdene. Başûr de dewleta tirke bi paştîdayîşê komelê mîyanneteweyî 7 mengî yo hêrişê îşxalî kena la tira netîceyêke nêgirewto. Dewleta tirka ke rixmê heme tennîkê xo vera xoverdayîşê gerîlayan de nêeşekena aver şiro çekanê kîmyewîyan şuxulnena. Mam Reşo, Zendûra, Werxelê, Girê Sor û Girê Qertalî de embazê ma pê nê çekan şehîd bîyî. Heme embazî  fermandarê nê şerî bî û bi tewirêkê fedayîkî warê xoverdayîşî arçarnayî warê binkewtişê dewleta tirke. Ma sey gerîlayan serê tewir û taktîkê şerî de vindertî. Ma tim xo aver benê. Xora na rewşe çalakîyanê gerîlayan de zî yena vînayene. Proses prosesê şerê şarê şorişgêrî yo. Ma şarê xo ra paştî genê.  Ma pê yewbînan estê. Wa şarê ma yê Ewropa zafêr têkoşîn bikero. Ganî ruhê serewedaritişê 90an hinî ganî bo ke welatê ma bibo azad.''