Tepişteyê bi nameyê Sedat Alçîçekî bi rayîrê keyeyê xo binpaykerdişê heqanê merdiman vatî. Alçîçekî ard ziwan ke cuya înan binê tehluke de ya û îdareyê zîndanî 3 serrî yo embazê înan Arîf Bayram nêbenê nêweşxane.
Alçîçekî keyeyê xo rê behs kerd ke îdareyê zîndanî bi hawayêkê xirabî nêzdîyê înan beno û vat: ''Gardîyanî nişka ra şewe erzenê koxûşanê ma ser. Destê xo danê her ca. Ma tersenê ke ê hê vîrusê Korona vila kenê. Xora vera vîrusî tedbîrî nêgêrîyenê. Îdar ne maske ne zî hacetanê pakîye dano ma. Kitabî nêdîyenê ma. Teberî ra xebera ma çin a. Îdare tena verdeno ke ma kanalanê îqtîdarî seyr bikerê. Embazanê ma ra zî xebera ma çin a. Bi bahaneyan warê hewayî ame qedexekerdene.''
Alçîçekî bale ante rewşa embazê xo yê nêweşî Arîf Bayramî ser û vat: ''Arîf Bayram 3 serrî yo dindanê ci de împlant esto la îdare ey nêbeno nêweşxane. Embazê ma seba ke nêeşkeno her werde biwero tede nêweşîyî peyda bîyî. Roje bi roje rewşa ci bena xirabêr. Ganî selahîyetdarî mudaxeleyê na rewşe bikerê.''
