Tepişteyo nêweş Azîz Tufan (29) 73 rojî yo Zîndanê Amedî de binê karantîna de yo. Tufan de nêweşîya roqle û mîde estê û ganî hetim bêro berdene bi nêweixaneyî.

Dadîya Tufanî Yesure Tufan (52)a ke çalakîya Nobeta Edaletî de Baroyê Amedî de ca gêna vera karantînaya serê lajê xo nêrazîbîyayîş mojna. Dayîke Yesure vat: ''5 serrî yo lajê mi tepişte yo û şertanê zîndanî ra nêweşîyê ci bîyî giranêr. Zîndan de awa germe nêdîyena tepişteyan û werde pê hacetê plastîkî danê. 70 rojan ra zêdêr o lajê mi binê karantîna de yo. Xebera ma pê rewşa ci çin a.''

Yesure Tufan îfade kerd ke yew sûcê domanê ci çin o û vat: ''Çîyo ke înan ard domananê ma ser nika zî wazenê bîyarê ma ser. Ez lajê xo rê nêzdî ya la keyeyê bînî şinê cayanê dûran ke zîndanan de domananê xo bivînê.  Semedo ke domanê ma wayîrê têkoşînê xo vejîyenê înan rê huqûqê dişmenî yeno caardene. Ma nika seba pêro tepişteyan nobete de yê. Wa waştişê dadîyan bêrê qebulkerdene. Wa dadîyî tewrê na nobete bibê. Ma hêvîdar ê ke nêzdî de do biresê domananê xo.''