Kekê Soydan Akayî û avûkatê ci Veysel Akay da zanayene ke rixmê nêweşîyanê ci zî kekê ci 4 serrî yo hucreyê yewkesî de tepişîyeno. Akayî venga her kesî da ke derheqê babeta tepişteyanê nêweşan de hîsger bibo.
Soydan Akay 1993 de bi sûcdarîya ke mesuldarê herêma Ege yê PKKyî tepişîya û heta nika maruzê xeylêk teda û işkenceyan mend. Soydan Akay de nêweşîyê kanserê prostatî, hepatît, romatîzma, spazmê qelbî û roqleyan estê.
Soydan Akayo ke Zîndanê Sîlîvrî de tepişîyeno 4 serrî yo hucreyê yewkesî de maneno. 2019 de îbranîyan ser o yew kitabê Soydanî weşanîya. 2020 de Almanya de bi wesîleya rojbîyayîşê 200. yê Beethovenî operaya 'Fidelio'yî ame mojnayene û tede qala Soydanî ameye kerdene.
Kek û avûkatê Soydan Akayî Veysel Akayî da zanayene ke 2009 de qestî ra birayê ci rê vîrusê Hepatîtî ame dayene. Veysel Akayî vat: ''Gereka birayê mi 2023 de bêro veradayene la verî ganî Caardişê Serbestîya Bikontrolî ra bivîyaro ke no caardiş vera tepişteyanê dewaya PKKyî yeno kerdene. Bi nê hawayî tepişteyan rê 'poşmanîye' yena caardene.
Nîsana 2018î ra nata birayê mi hucreyê yewkesî de tepişîyeno. Vera nê kerdişî ma dewa akerde. Goreyê peyman û qanûnan tepişteyî hende wextî gereka hucreyê yewkesî de nêtepişîyê. Kekê mi 2021 de reyna maruzê hêrişêkî amebi û ma zî naye ser o muracatê CPTyî kerd. Ez wazena rayaumûmîye û komel na babete de hîsger bibê. Sere de rêxistinê komelê sivîlî ganî pêro dezgehê komelkî seba tepişteyanê nêweşan têbigêrê.''
