Avûkat Onur Duşunmezî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Duşunmezî vist vîrî ke dima ke Abdullah Ocalanî teslîmê Tirkîya ame kerdene avûkatan 16ê sibata 1999î de muracatê Mehkemeya Heqanê Merdiman a Ewropa (MHME) kerd, 12ê gulana 2005î de Dayîreyê Berzî bire daye ke heqê muhakemekerdişê têdûştî û qedexeyê îşkenceyî ameyê binpaykerdene. Duşunmezî vat ke avûkatan serranê 2003, 2004, 2006 û 2007an de zî muracatê MHME kerd. 

Avûkat Duşunmezî da zanayene ke 18ê adara 2014î de mehkeme bira (no.2) Ocalan-Tirkîya de no tesbît kerd: ''Cezaya zîndanî ya muebede eke heta peynî dewam bikera no binpaykerdişê qedexeyê îşkenceyî yo.'' Duşunmezî vat ke MHME hukm da ke na babete de vurîyayîşê qanûnî wa bêrê kerdene.

Duşunmezî bale ante nîqaşanê 'heqê hêvîye' ser ke wextê peyênî de rojdem de yê û vat: ''Pê bira cezaya muebede destê tepişteyan ra heqê hêvîye yeno girewtene. No zî binpaykerdişê heqanê merdiman o. Dewleta huqûqî ganî hertim goreyê huqûqî têbigêra. Tirkîya hema birê MHME yê serê Demîrtaş û Kavalayî nêardî ca. Îqtîdar mudaxeleyê muhakemekerdişî keno ke no hetê huqûqî ra nêeşkeno bêro îzehkerdene.''

Avûkat Onur Duşunmezî pare kerd ke vera peymananê ke morê xo da binê ci têgêrena û hem qanûnanê xo hem zî qanûnanê mîyanneteweyîyan binpay kena, kerdişanê vera rûmetê merdimîye de israr kena û nê zî eşkera kenê ke a senî xeta huqûqî ra dûr kewta. Duşunmezî vat: ''Ganî kerdişê xirabî û îşkenceyî bêrê qedînayene, tecrîd wedarîyo û heqê hêvîye bêro caardene.''