Şaristananê Vakurê Kurdîstanî de varayîşê vewre bi giranî dewam keno. Dêrsim, Amed, Riha, Dîlok, Mêrdîn, Mûş û Xarpêtî de dibistanan mabên da, Çewlîg û Dêrsim de cemed virazîya. Rayîrê Dîlok-Adana qefilîya û raywanî rayîr a mendî.

Çewlîg û Dêrsim vewra girane ra dima bi temamî bîyî sipî. Serdî ra serê banan, rayîran û wesayîtan cemed girewt. Meteorolojî hişyar kerd ke vewre do dewam bikera û ganî ramitoxî rayîran de baldar bibê.

Herêma Koyanê Nûrî ya Dîlokî de şewe vewre ra rayîrê Dîlok-Adana qefilîyayî. Bi hezaran raywanî rayîr a mendî. Raywanan nêrazîbîyayîşê xo mojna û ard ziwan ke şewe ra nata selahîyetdarî înan de eleqedar nêbîyî.

Amed de vewre rayîrî qefiilnayî û merdimî neçare mendî ke pê payan şorê karî. Qeyûmê Amedî hema zî seba akerdişê rayîran xebate nêdaye destpêkerdene. Şaristan de dibistanan mabên da û seferê teyarayan ameyî betalkerdene.