Kongreya Komelanê Demokratîkan (KCD), Kongreya Demokratîke ya Şaran (HDK), Têgêrayîşê Cinîyan ê Azadan (TJA), Partîya Herêmanê Demokratîkan (DBP) û HDPyî pîya Buroyê DBPyî yê Amedî de derheqê hêrişanê Tirkîya de eşkerayîyêka hempare daye.

Eşkerayîye de Hemserekê KCDyî Berdan Ozturkî qisey kerd û da zanayene ke Tirkîya waştêne Hesekê de  DAÎŞî gandar bikera la no armancê ci nêame caardene. Berdanî ard ziwan ke Tirkîya narey zî Mexmûr, Şingal û Rojawan dayî bombayan ver. Ozturkî vat: ''Kampa Mexmûri binê mesuldarîya Neteweyanê Yewbîyayeyan de ya. Nê hêrişî nênê qebulkerdene. Nêçîrvan Barzanîyî û Erdoganî nê hêrişan ra dima pêvînayîşêk kerd. Ganî partîyê Başûrî bizanê ke nê kerdişî dişmenîya vera pêro kurdan a.  No pêvînayîş yeno a mana ke ê şirîkê nê hêrişan ê. Hemkarîya bi dişmenê kurdan çewî rê fayde nêkena. Ganî ma vera nê  hêrişan tewirêkê hemparî bimojnê. Ganî dezgeh û rêxistinê mîyanneteweyî vera nê hêrişan vengê xo bivejê.''

Hemsereka DBPyî Salîha Aydenîz zî pare kerd ke Tirkîya pê nê hêrişan armanc kena ke destkewteyê pêro kurdan çin bikerê û vat: ''21 bombayî erzîyayî Şingalî. Armancê nê hêrişî temamkerdişê fermanê 74. yo.  La şarê Şingalî do xoverdayîşî rê dewam bikero. Ma hetê şarê Şingalî de yê.  Tirkîya pê nê hêrişan wazena DAÎŞ gandar bilkera. La kurdî do pê têkoşînê xo wayîrê destkewteyanê xo vejîyo.'' 

Hemvervatoxê HDKyî Cengîz Çîçekî vat: ''AKP-MHP hê rijîyenê. Ma venga pêro şaranê Tirkîya danê ke meseleya kurdan têna meseleyêka kurdan nîya. Seba ke na mesele çareser nêbena xizabîye û bêkarîye qewimîyenê. Ganî vera nê hêrişan hêzê demokrat û azadîgîrî têkoşînê hemparî bikerê. Eke ma yewîya xo awan bikerê eşkenê ser bikewê.''