Iraq de 10ê teşrîna verêne ya 2001î de nawnayîşanê 3 mengan ra dima weçînayîşê pêroyî ameyî kerdene. Meclîs 9ê çeleyê 2022î de Muhammed Helbusî yo Sûnî newe ra bi serekê Meclîsî, Hakîm Zanli yo Şîî û Şaxewan Abdullah o PDKgîr bîyî hetkarê ci. La çar rojan ra dima Mehkemeya Federale ya Iraqî karê Dîwanê Serekîya Meclîsî vindarnayî. Akademîsyenê Zanîngehê Dihokî Dr. Kamûran Berwarîyî derheqê babete de ANFyî rê qisey kerd.

Dr. Berwarîyî îfade kerd ke serebûtê ke Iraq de qewimîyenê netîceya peymana 2021î yê ke Urdun-Amman, Îmarat û Qatar de mabênê kurdan, erebanê sûnîyan û hêzanê bînan de ameye kerdene. Berwarîyî da zanayene ke na peymane tesîrê netîceyanê weçînayîşan zî kerdo û cara nê netîceyî îradeyê Iraqî temsîl nêkenê.

Dr. Berwarîyî vat: ''Na peymane vera şaranê Kurdîstanî û Iraqî ya. Na peymane beno ke biba sebebê şerî. Na peymane û nê sîyasetî kurdî kerdî di-hîrê parçeyî, sûnî û şîîyî zî kerdî d-hîrê parçeyî. Tewr zaf no zerar dano kurdan. Çunke kurdan nê 20 serran de seba xo çîyêk nêkerdo. Meclîs seba ronayîşê hukmatî paştdayîşê 170 wekîlan wazeno la nika mumkîn nîyo ke hukmatêk paştdayîşêkê winasênî bigêro. Hetê bînî ra Meclîs zî seba ke bixebito hewceyê teqdîqê Amerîka, Ewropa û tay hêzanê herêmîyan o. Nika mabênê Îran û Tirkîya û Amerîka û Yewîya Ewropa de nakokîye esta. Hêrişê vera noqtayanê Amerîka û Koalîsyonê Mîyanneteweyî rewşe kenê giranêr. A raşte roniştişê destpêkî yê Meclîsî bi mesajanê balkêşan derbaz bîyî. Rewşa nikayêne de zehmet o ke Iraq de hukmatêko newe bêro awankerdene û welatî îdare bikero.''

Dr. Berwarîyî nêzdîbîyayîşê PDKyo ke namzetê xo yê Serekkomarîye eşkera kerd wina ercna: ''Sadr zî paştdayîş nêdano namzetê PDKyî Hoşyar Zebarîyî. Vera Zebarîyî nika ra 36 wekîlan deklarasyonêk weşana.  Destpêkerdişê xoapeygirewtişê Amerîka beno ke meseleyan giran bikero. Nika cara krîzêko pîl esto. La rixmê ney zî îdareyê Başûrî qetî goş nêdano şarî. Eke rewşe bi nê hawayî dewam bikera seba Iraq û Başûrê Kurdîstanî do tehlukeyîn biba.

Nika mabênê Tirkîya û Rûsya de hemkarîye esta, menfaatê înan ê hemkarî estê ke na hemkarîye Rojawan û Başûrê Kurdîstanî eleqedar kena. Tirkîya û Rûsya projeyê rayîrê asenî ser o xebitîyenê ke Iraq û Sûrîye ra biresê Îmaratî. Amerîka û Koalîsyono Mîyanneteweyî vera nê porjeyî têgêrenê. Xeylêk hêzê Iraqî ney qebul nêkenê. Kombîyayîşê Meclîsî zî vera şîîyan, netîceya peymana mabênê Baasgîran û hêzanê nêzdîyê Tirkîyan bîye.''