Tepişteyê bi nameyê Aldulcelîl Dagtekîn (35) Zîndanê Mêrdînî de 30ê teşrîna verêne de krîzê qelbî derbaz kerd û tetkîkan ra dima revîrê zîndanî ra erşawîya koxûşî.

Dagtekîn 31ê teşrîna verêne de reyna bêhal bi, erşawîya koxûşî û dima reyna bêhal kewt. Bire dîyaye ke Dagtekîn sewqê Nêweşxaneyê Dewlete yê Mêrdînî bêro kerdene. Verî ke Dagtekîn cinişo ambulansî cebdirmeyan serê ci kontrol kerd û waşt biewnê zereyê fekê ci. Dagtekînî no qebul nêkerd coka sewqê nêweşxaneyî ame kerdene.

Komîsyonê Heqanê Merdiman ê Baroyê Mêrdînî muracatê Serdozgerîya Komare kerd û gerreyê mesuldaran kerd.

Şubeyê Mêrdînî yê ÎHDyî û OHDyî derheqê babete de eşkerayîyêke weşanaye û vat: ''Cigêrayîşê zereyê fekî binpaykerdişê heqî yo. Ganî tepişteyê ke sewqê nêweşxaneyî benê înan rê cigêrayîşê zereyê fekî nêro kerdene.''