Şewato ke Çemê Roje yê Gelîya Pilemurîye yê Dêrsimî de 28ê tebaxe de qewimîya her ke şino beno pîlêr.

5 rojan ra dima şewatî rê mudaxele ame kerdene. Hemwelatîyanê ke merkezê şaristanî, Qisle, qezata Depe ya Xarpêtî ra ameyî, dest pê hewnakerdişê şewatî kerd. Helîkopterêkî zî hewayî ra mudaxeleyê şewatî kerd.

Hemwelatîyan waranê şewatî de kovanê çeka Endustrîya Kîmya ya Makîna (MKE) ya helîkopteranê leşkerîyan dîyî. Hemwelatîyan pare kerd ke şewat nê guleyan ra semed vejîya.

Hetê bînî ra vizêr nêmroje nêzdîyê Zanîngehê Munzurî de taxa Aktolukî de daristanan de şewat vejîya. Hemwelatîyî û 2 helîkopterî mudaxeleyê şewatî kenê. Şewat ver bi dewa Rubaîkî şino.