Gerîlayanê HPG û YJA Starî derheqê tecrîd, têkoşîn û xoverdayîşê Rayber Apoyî û Gerîlayanê Azadîye yê Kurdîstanî de ANFyî rê qisey kerd

 ‘Hedefê ma xelisnayîşê Rayber Apoyî yo’

Gerîlayanê YJA Starî ra Şoreşe, nîyadayîşê xo wina ardî ziwan, ‘‘Bi taybetî nê deman de ma halê Rayber Apoyî meraq kenê. Nêzdîya 2 serrî yo ke ma xeberêke nêgenê û seba ney ma biguman ê. Stratejîya ma ya demkilme zî a ya ke ma Rayberê xo mîyanê nê prosesî ra bixelisnê. Keda Rayber Apoyî seba ma têgêrayîşî û seba heme dinya zaf a. Xeylê kede û hewldayîşê Rayber Apoyî bîyî seba azadîya ma. Ma zî şagirtê ey ê. Ma do têkoşînê xo xurtêr bikerê û darbe bidê dişmenî ro.

Dewleta tirke, planê xo yê serra 2022î de, seba ke têgêrayîşê orte ra hewana, metodê tewr qilerinê xebitnayî. Xebitnayîşê çekanê kîmyasalan û qedexeyan waşt ke plananê xo bera sere. La xoverdayîşê gerîlayan bi ruhê Rayber Apoyî nê planî înan pûç kerdî.

Ma têkoşînê xo ra bawer ê. wexto ke cinîyî vejîyenê waran, no, çimê dişmenî tersneno. Bi qetilkerdişê Nagîhane Akarsel, Evîne Goyî û Embaze Sara ra no tersê îşxalkeran dîyar beno. Ma eşkenê vajê ke dişmen çinbîyayîşê xo şexsê cinîyan de vîneno. Coka dişmen nêeşkeno ma çin bikero, ma gerîlayî hêzê xo ra bawer ê. Hedefê ma o yo ke ma Rayberê xo hetê fîzîkî ra azad bikerê û Kurdîstanî ra dişmenan dûrî bifînê.’’

‘Bi xebitnayîşê çekanê qedexeyan rastîya faşîzmî zafêr vejîyena meydan’

Gerîlayanê YJA Starî ra Dîroke Azad zî dîyar kerd ke, gere tewr zaf cinîyî wayîrê keda Rayber Apoyî bivejîyê. Çunke keda Rayberî seba cinîyan zaf a û wina vat, ‘‘Şerê nikayinî ra merdim hîna zaf hovîtîya dişmenî vîneno. Bi taybetî xebitnayîşê çekanê qedexeyan rastîya faşîzmî zafêr vejeno meydan. Rasta zî dişmeno ke qet însanetî ra bara xo nêgirewta.

‘Hedefê şehîdanê ma hedefê ma yo’

Gerîla Dîroke bale ante komkiştişê Kurdîstanî û hêrîşanê peynîyan ser o û wina vat: ‘‘Bi qetilkerdişê şarê ma yê sivîlan û hêrîşê peyênî yê Parîsî, wazenê îdareyê şar û gerîlayanê ma bişiknê. Seba ney zî bi çekanê qedexeyan bi metodanê qilêrinan wazenê plananê xo berê sere. Ney ra yeno famkerdene ke dişmen îrade û şerê gerîlayan ra terseno. Gerîlayî ewro bi çek û bombayanê xo xover danê. Ma cinîyî wazenê raybertîya ney bikerê. Senî ke Şehîd Rûkene û Sara rayîrê Zîlane xo kerdbî esas û rayîrê fedayîtîye weçînayî, ma zî ê daraxî de ser o fikirênê. Hedefê şehîdanê ma hedefê ma yo’

 ‘Dişmen Zap de xetimîya’

Gerîlayê HPGyî Egîd Nûdayî zî destpêkê qiseykerdişê xo de ard ziwan ke planê îşxalkeran pûç bîyî û wina dewam kerd, ‘‘Planê îşxalkeran ke seke hesab kerdbî, pûç bîyî. Bi xebitnayîşê çekanê kîmyasalan zî nêeşkîyayê îradeyê gerîlayan teslîm bigîrê. Bi taybetî şerê Zapî de xetimîyayî. Xoverdayîşê gerîlayan dişmen xetimna. Êyê ke ser kewt ê, gerîlayê Kurdîstanî bîyî.

Xoverdayîşê embazan dewam keno, gerîlayan xoverdayîşê xo ra fek nêverdayo. Ma gerîlayî zî waranê ke ma nika tede yê, hazirîyanê xo yê hêrîşan kenê.

‘Bi tecrîdî wazenê îradeyê şar û gerîlayan bişiknê’

Gerîlaya YJA Starî Serhildane Can zî behsê tecrîdî kerd û vat, ‘‘Bi tectîdê Rayber Apoyî wazenê şexsê Rayberî de îradeyê şar û gerîlayan bişiknê. Seba ke têkoşîno ke ewro yeno dayene, xeylê xurt o. Beno ke ma berdelê giranî dayî la bi nê berdalan îdîayê ma xurtêr benê. Ma sozê xo reyna anê vîrardene; ma do heyfê şehîdanê xo erdî ra nêverdê.

 ‘Ma fedayîyê şar û Rayberîye yê’

Gerîlaya YJA Starî Xemlîne Zîlan zî amancê xo yê hemverê tecrîdî zî wina ard ziwan, ‘‘Ma tecrîdî qebul nêkenê. Ma bi serran o ke hemverê planê qirkerdişî de şer kenê. Ewro zî no plan hîna zaf dekewto rojeva îqtîdarî û wazeno planê xo biresno sere. Xoverdayîşê embazanê ma hêzêko gird dano ma. Çend hêrîşê îşxalkeran vêşî bibê îradeyê ma zî xurtêr beno. Ma fedayîyê şar û Rayberê xo yê.’’