Doktore û gerîlaya YJA-Starî Rûkene Samsun ANFyî rê hêrişê îşxalî û xoverdayîşê gerîlayan ercnayî. 

Doktore Rûkene bale ante ser ke artêşa tirke ya îşxalkere Herêmanê Pawitişî yê Medya de çeka kîmyewîye şuxilnena û vat: ''No Werxelê de zaf ame dîyene. Çeka kîmyewîye binkewtişê artêşa tirke îsbat kenê.  Nê çekê kîmyewî seke zanîyeno zerar danê refleksanê merdiman, nefesî kenê teng, bedenî vêşnenê. Çekê kîmyewîyî pêro dinya de qedexe yê. Vera gerîlayan şuxilnayîşê çeka kîmyewîye bêexlaqîyêko pîl o.

Xoverdayîşê gerîlayan de îrade vejîyeno werte. Ma Werxelê de no dî. Xoverdayîşêko winasên tarîxê dinya de tay ame dîyene. Ma vînenê ke felsefeya Rayberîye gerîlayan senî xurt keno. Wexto ke ma bawerî û îradeyê embazanê xo vînenê ma tira hêzî gênê. Gerîlayî tîya de şerêkê bêhempayî û fedayî kenê. Embazê ma senî ke bi fedayî, fedakarî tewrê cuye benê nê çîyan şerê xo de zî mojnenê.

Her ke şino dişmen hêrişanê kîmyewîyan zêdîneno. Ma wazenê cigêrayîşanê xo yê tedbîran zêdêr bikerê. Ma zanenê ke wextê operasyonî de şerêko giran qewimîyeno. Waranê şerî de şehadetê giranî zî benê. Embazê ma birîndar zî benê. La rixmo ke birîndar benê embazî şerî rê dewam kenê. Ma tewirê nê embazan xo rê esas gênê. 

Embazê ma ewro têna semedê şarê kurdî nê semedê pêro şaran şerê azadîye kenê. Hişmendîya AKP-MHPyî ewro mabênê şarê tirkî û şarê kurdî de pê şerê taybetî û gemarinî polîtîkayan kena û mabênê şaran de dişmenîye virazena. Ganî şarê kurdî vera çekanê kîmyewîyan, qirkerdişan sere wedaro. Ganî şar vera çekanê kîmyewîyan wayîrê gerîlayan vejîyo. Azadîye zaf nêzdî ya. Bi yewîya şaran ma do ser bikewê.''