Şingal de netîceya hêrişê bi SÎHAyan ê dewleta tirke de di endamê YBŞyî şehîd kewtbî. YBŞyî bi eşkerayîyêke nasnameyê di endamanê xo eşkera kerdî.

Eşkerayîye wina ya:

''21ê çeleyî de dewleta tirke ya îşxalkere pê SÎHAyan hêrişê hêzanê ma kerd. Nê hêrişî de embazê ma Azad Êzdîn û Enwer Tolhildan şehîd bîyî. Hêriş de di embazê ma zî birîndar bîyî.

Fermandarê ma yo ezîz Azad Êzdîn wextê hêrişanê DAÎŞî yê vera Şingalî de dejê şarê xo dî û bi fedakarîyêka pîle mîyanê têkoşînî de ca girewt. Şerwanîye ra heta fermandarîye ey xeylêk wezîfeyî girewtî xo mil. O şerwanêko çêr û zelal, fermandarêko têkoşer, kedkar û perwerê dewa bi. Ey hêrişanê vera Şingalî de kişta Şehîd Berxwedan, Şehîd Zerdeşt, Şehîd Dijwar, Şehîd Pîr Hemît û Şehîd Bêrîvanan de ca girewt. Emnbaz Azadî seba ke sozê azadkerdişê Şingalî bîyaro ca xîret kerd. Têkoşînê ey bi sembolê şar û embazanê ma, ma do bi tewirê dişmenî ra  hesabpersayîş û qesasî têkoşîn bikerê.

Embaz Enwer  hema ke qij tewrê YBŞyî bi. O tim bi hîsê afernayîşê cuyêka azade mîyanê xoverdayîşî de ca girewt. Ey fedakarîyêka pîle nê têkoşînî de mojnaye. Embaz Enwer pê têkoşêrîya xo bi sembolê Êzidxanî. Ey vera pêro kayanê serê ciwananê Şingalî pê welatperwerîya xo bi cewab. Enwer rayraşîyayîşê xo yê azadîye de qet yew astengîye nêşinasnaye. Ey tim xo rê serkewtiş esas girewt.

Roja verêne ra nata ma seba cuyêka azade bedelê giranî dayî. Ma soz danê embazanê xo yê şehîdan ke 'Şingalo îşxalkerde' do têna xeyalê dişmenî de bimano. Ma do seba Şingalê xoserî têkoşînê xo rê dewam bikerê. Nê esasî ser o ma şexsê fermandar Azad û şerwan Enwerî de pêro şehîdan yad kenê. Ma rîyê xo verê vîrameyîşê înan de anê war. Ma keyeyanê înan rê serweşîye wazenê.

Nasnameyê şehîdanê ma wina yê:

Kod: Azad Êzdîn

Name û Peyname: Silêman Şemo Yusuf

Tarîxê Bîyayîşî: 11.02.1993-Sîba Şêx Xidir

Tarîxê Şehadetî: 21.01.2022-Deriyê Şilo

Kod: Enwer Tolhildan

Name û Peyname: Nacî Hecî Sebro

Tarîxê Bîyayîşî: 1996-Xanesor

Tarîxê Şehadetî: 21.01.2022-Deriyê Şilo