Fermandaranê Yewinanê Pawitişê Rojhelatê Kurdîstanî (YRK) ra Şîyar Şevgerî derheqê hêrişanê dewleta Îranî û dewleta tirke de ANFyî rê qisey kerd.

Qiseykerdişê Şevgerî ra tay noqtayê girîngî wina yê:

''Dewleta tirke û Îranî pîya vera PJAKî hêrişan plan kenê û têgêrenê.  Waranê gerîlayan ê Rojhelatê Mîyanênî de têgêrayîşê hewayî zêdîyayî. Teyarayê keşfî her roje herêmanê ma ser o gêrenê, agahîyanê ke hetê PDK û dewleta tirke ra şawîyenê, ser o hêrişê ma kenê. Dewleta tirke û Îranî heta nika nê hêrişan de netîceyêke nêviste destî. Ê vera têgêrayîşê ma yê Apogîrî bin kewenê. Rojawan, Başûr, Vakur û Rojhelatê Kurdîstanî de hêrişê giranî yenê kerdene. Ma bi qerardarî vera nê hêrişan xo ver danê û do xo ver bidê.

Ma sey gerîlayanê YRKyî çarçewa adirbirnayîşî de têgêrenê. La ganî dewleta Îranî zî wina têbigêra. Ma hêzê pawitişî yê û seba şarê xo têkoşîn kenê. Ma terefgîrê dîyalog û çareserîye yê, terefgîrê şerî nîyê. La vera hêrişanê serê şarê ma, ma do bêcewab nêmanê. Ganî dewleta Îranî waştişê dewleta tirke ser o tênêgêra.  Dewleta Îranî wextanê peyênan de hêrişê Merîwanî, Koselanî kerd. Ma gerîla yê û her cayê Kurdîstanî de yê. Ganî dewleta Îranî ya kolonyalîste adirbirnayîşî xo rê sey firsendêkî nêvîna. Ma kenê ke meseleyan bi rayîrê dîyalogî çareser bikerê. La tay hêzê herêmî bi sîyasetê gêmarinî xîret kenê ke şarî ma ra dûrî bikerê. Ganî şarê ma verê ney de hişyar û hesas bibo. Ganî şarê kurdî tewirê xo bimojno û nêverdo ke dişmen, hêzê Besîçî yê paramîlîterî û hêzê înan ê hemkarî wareyanê ci de ca bido xo. 

4ê hezîrana 2023yî de embaz Erdal Amed (Hesen Mihemedî) Koyê Asosî de hêrişê dewleta tirke de şehîd bi. Embaz Erdal kurdêko welatperwer bi. O hetê Îranî ra tepişîyabi la rixmê îşkenceyanê giranan zî qisey nêkerdbi û dima tewrê gerîlayanê PJAKî bibi. Embaz Erdal sembolê xoverdayîşî bi. Ma soz danê ke têkoşînê ey pîl bikerê. Ganî ciwanê Merîwanî wayîrê mîrasê ey vejîyê û rêçê ey teqîb bikerê.''