Endama Konseya Rayberdişî ya KJKyî Zerîne Ruken 25ê Teşrîna Peyêne Roja Têkoşînê Vera Şîdetê Serê Cinîyan û tecrîdê vera Rayberê Şarê Kurdî Abdullah Ocalanî ANFyî rê ercnayî.

Qiseykerdişê Rûkene ra beşêk wina yo:

''Nê dewrî de vera şîdetê sîstemê serdestîya camêrdan cinîyî bi her hawayî payan ser ê û hêrişa. Seserra 21. ra nata cinîyî rayberîya vurîyayîşan kenê. Cinîyî game bi game nêzdîyê azadîye yê. Cinîyî azadkerdişê Rojhelatê Mîyanênî û pêro dinya de bi rolê girîngî têgêrenê. Her cayê Kurdîstanî ra bi ruhê serewedaritişî cinîyê kurdî rayberîya şorişê Rojhelatê Mîyanênî kenê.

Hemleya ma 'Vera qirkerdişê cinîyan wext wextê komelê azadî û cinîya azade yo' û Hemleya 'Wextê Azadîye' pê wayîrvejîyayîşê pîlî her cayê dinya de yenê pêşwazîkerdene. Hetê bînî ra xoverdayîşê gerîlayanê azadîye û çalakîyê cinîyan ê kurdan paştdayîşêkê pîlî vînenê. Ma pê bawer ê ke emser 25ê Teşrîna peyêne hetê çalakîyanê têkoşînê vera şîdetî ra hîna xurtî derbaz bibê. Çunke mîyanê cinîyan de 'ruho hempar, hîs, mezge û waştişê dinyayêka azade xurt benê.' Çunke cinîyî mîyanê na serre de bi rêxistinîya xo vera qirkerdişê cinîyan weriştî we.

Xeta azadîye ya cinîyan hînî asena. Ma dewrê şorişan de yê. Ma vînenê ke dewrê azadîye yê cinîyan de xeylêk şorişî do bêrê kerdene. No dewr dewrê azadîye yo. Ganî cinîyî verê xo bidê têkoşînî, teber de megêrê çareserîye. Rêxistinîya cinîyan do çerxê nê îqtîdaran bivurna. Dewletê neteweyî qirkerdişê cinîyan ra mesuldar ê. Pêro îqtîdarê dîktatoran faşîst, îşxalker û kiştox ê. Dewleta tirke û îqtîdarê AKP-MHPyî zî Rojhelatê Mîyanênî serkêşîya nê qirkerdişê cinîyan kenê. Pêro dinya de vera polîtîlayanê dişmenîya cinîyan ganî ma her ca de, Rojhelatê Mîyanênî de, Tirkîya de, Îran de, Kurdîstan de têgêrayîşê cinîyan, têkoşînê hemparî û yewîya cinîyan xurtêr bikerê.

Wextê ci ameyo ke mîyanê komelêkê azadî de, sey cinîyan ê azadan şert û mercê cuya demokratîke bêrê awankerdene. Ma wayîrê nê huner û hêzî yê ke sey cinîyan pîya bicîyê. Cinîyî ê komel ê ke hişmendîya neteweya demokratîke reyde ciwîyenê. Coka ma zî vajê 'Vera qirkerdişê cinîyan wext wextê pawitişê cinîya azade û komelê azadî yo.' Têkoşîno rêxistinbîyaye yê cinîyan do faşîzmî birijno.

Ganî ma bimojnê ke ma rayberîya azadîye rê amade yê. Sey cinîyan ma vajê 'Cinîye, Cuye, Azadîye.' Şîdetê vera cinîyan bi bername, polîtîka û stratejîyanê hîran eşkeno werte ra bêro wedarnayene. Coka têkoşînê ma her roj o, her hel o.

Tecrîdê vera Rayberîya ma mojneno ke îqtîdaro faşîst AKP-MHP vera pêro Kurdîstanî şerê îşxalî ano ca. Şarê dinya ewro seba azadîya Rayberîye payan ser ê. Cinîyî zî payan ser ê û têkoşînî pîl kenê. Seserra 21. de wextê ci yo ke Rayber Apo azad bibo. Ma hê hela azadîye de yê.

Ma menganê peyênan ê 2021î de yê. Cinîyê kurdî, vera qirkerdişê komelî û cinîyan, vera sîstem û hişmendîya serdestîya camêrdan mîyanê hesabpersayîşêkê xorinî de yê. Gerîlayê cinîyî tarîx î goreyê na raştîye newe ra nusenê û şaristanîya faşîste ya camêrdan ra qesasê cinîyan gênê.''