Rojawan de ciwanî semedê pawitişê erdê xo tewrê QSDyî benê. Yewîya Cinîyan a Herêma Firatî ke roja sêşemeyî kombîyayîşê xo yo serrane kerd û qerarê serferberîye girewt.

Kombîyayîş de taburo xoser ame ronayene û qerarê tewrbîyayîşê şerê Eyn Îsayî ame girewtene. Badê nê qerarê 40 cinîyê ciwanî seba ke vera hêrişanê dewleta tirke û çeteyanê ci welatê xo bipawê tewrê QSDyî bîyî.

Nê cinîyan ra Canê Ebdo vat: ''Têna vera herra ma nê vera ciwanan zî şerêk yeno rayaberdene. Dişmen bi metodanê taybetan wazeno ciwanan bixapîno û goreyê waştişanê xo bişuxulno. Wazenê ciwanan bikerê ajan û bikerê mîyanê fûhûş û madeyê kundoxî. Ganî vera nê kayan ma hîşyar bê.''

Rewşene Elî zî vat: ''Ma do çirey destûr medê ke dişmen plananê xo yê leyminan herra ma de bîyaro ca.  Heta ke ma dewleta tirke û çeteyanê ci  erdê xo ra vejê ma do têkoşîn bikerê. Ma do çirey peyser game meerzê. Ma qerardar ê ke dişmenî erdê xo ra vejê ke şarê herême agêro herra xo.''

Tolîne Mihemed zî vat: ''Ma do rêça şehîdanê xo de têkoşînî pîl bikerê. Ez veng dana heme cinîyan ê ciwanan, paştî bidê ma û tewrê tabûra ma bibê. Ma vera dişmenî pîya şer bikerê û herra xo azad bikerê.''