Mêrdîn de cinîyî vera şîdetê camêrdan, qirkerdişanê vera cinîyan û madeyê narkotîkî vizêr vejîyayî waran. Cinîyê ke serkêşîya Platformê Cinîyan ê Şahmaran û TJA de ameyî têhet qezaya Artuklu de rayraşîyayîş kerd. Cinîyan ke fotografê cinîyan ke ameyî qetilkerdene kiriştî bi pankertê “Ma vera qirkerdişê cinîyan cuye û haştîye pawenê” rayra şîyî û sloganê sey  “Jin, jiyan, azadî”, “Kuştina jinan politik e” vatî.

Badê rayraşîyayîşî metnê eşkerayîye ame wendene. Eşkerayîye de ame vatene ke îlkeyê “Jin, jiyan, azadî” yo ke felsefeya cuye ya cinîyan a,bi hewayêkê sîstematîkî yeno hedefgirewtene. Ame vatene ke kiştişê cinîyan netîceya sîstemê camêrdê serdestî,polîtîkayanê dewlete û kulturê bêcezayîye de ya û bale ame ser antene ke cinayetê vera cinîyan polîtîk ê.

Eşkerayîye de ame vatene ke qikerdişê cinîyan û xokiştişê cinîyan ke dewrê peyênî de Mêrdîn de benê tesaduf nîye û dewlete semedê cinîyan ê ciwanan verê madeyê narkotîkî akena.

Cinîyan vat ê do vera nê sîstemî milê xo çewt nêkerê û têkoşînê cuye azade rê dewam bikerê û waştişê xo wina rêz kerdî: “Wa mergê cinîyan bi tewirê bêhetî bêrê cigêrayene, mekanîzmayê pawitişî bêrê şuxulnayene, zextê vera dezgehanê cinîyan bêrê qedînayene, kerdoxê camêrdî wa bi edaletê raştî bêrê muhakemekerdene, wa vera madeyê narkotîkî tedbîrî bêrê girewtene û polîtîkayê pawitişî bêrê averberdene.”

Cimîyan eşkerayîya xo bi vengdayîşê xurtî yê cuye qedîna: “Ma wazenê azad biciwîyê! Ne cînayetê xokiştişî ne zî bêcezayîye qebul kenê. Ma do serkêşîya cinîyan de haştîye înşa bikerê.”