Komeleya Kultur, Hetkarî û Averberdişî ya Gêxî, Depe, Azarpêr, Xorxol û Çêrme (KAYY-DER) vist vîrî ke daristananê qezaya Kanîreşî ya Çewlîgî birnayîşê daran dewam keno vat cilmê nê qirkerdişî milê wekîlanê AKPyî yê Çewlîgî de yo.

Eşkerayîya KAYY-DERî ke 4ê teşrîna peyêne de hesabê ci yê medyaya sanale de ameye parekerdene de nê ameyî vatene:

''Karakcehenemê Kanîreşî de birnayîşê daran dewam keno. Ma menga êlule de vera nê qirkerdişî têkoşîn dabi destpêkerdene la ma ser nêkewtî. Birnayîşê daran ke 6ê teşrîna verêne de dîya destpêkerdene û îhaleyê ci dîyayo qoricîyan yeno domnayene. Destûr nêdîyeno ke çew/e debikewo herême. Hetê bînî ra kamyonêk şina kamyonêk yena. Walîtîye vana semedê ganîkerdişê daran û selahîyetdarê leşkerî vanê  semedê asayîşî birnayîş yeno kerdene. Heme dezgehî zî nêzanê ê hay sekenê.

Hinî bes o, nê qirkerdişê daran vindarnê. Hinî bes o, zengînîya ma ya tebîî yewbînan rê pêşkêş mekerê.

Di wekîlê Çewlîgî ke înan ra yewî wezîrîye zî kerda bêveng ê. Seke şima wezîfe de yê tim Çewlîg de qirkerdişo ekolojî bibi û heta ke şima bibî do dewam zî bikero. Cilmê her gileyî ke şikîyeno, her heywano ke yeno qetilkerdene û her dara ke yena vêşnayene milê şima de yo. Birnayîşê darano ke rîyê varayîşî ra panc rojî yo mabên dîyayo ci wa cade bêro vindarneyene. Xoza û ameyoxê ma çîn mekerê.''