Girê Sipî

Qezaya Cirînê ya Girê Sipî de şar bi rayraşîyayîşêk wayîrê xoverdayîşê QSDyî yê vera hêrişanê dewleta tirke vejîya. Rayraşîyayîş de bêvengîya komelê mîyanneteweyî zî ameye şermezarkerdene.

Rayraşîyayîşî ra dima nawnayîşêk ame kerdene. Hemsereka PYDyî Bêrîvane Îsmaîl nawnayîş de qisey kerd û vat: ''Ma venga hukmatê Rûsya danê ke wa hêrişanê vera Eyn Îsayî vindarnê.''

Hemserekê Meclîsê Cirînê Mahmûd Mustafayî zî bale ante xoverdayîşê QSDyî ser û venga şarî da ke wayîrê ci vejîyo.

Hetê bînî ra Tebqa de Meclîsê Ciwanan seba wayîrvejîyayîşê QSDyî eşkerayîyêke daye û ard ziwan ke ê hetê QSDyî de yê.

Til Rifat

Qezaya Til Rifatî ya Şehba de rayberîya Têgêrayîşê Wendekaran ê Demokratîkan ê Efrînî û Têgêrayîşê Ciwanan ê Şorişgêran ê Sûrîye de rayraşîyayîşêk ame kerdene. Rayraşîyayîş de posterê Rayberê Şarê Kurdî û pankartê bi nuşteyê 'Wextê Azadîye yo', 'Biciwîyo Xoverdayîşê Gerîlayan' ameyî kiriştene.

Dima hetê Rîm Dada ra eşkerayîye ameye wenden û hêrişaê vera Eyn Îsayî ameyî şermezarkerdene û seba paştdayîşê bi QSDyî mesajî ameyî dayene.

Minbic

Bajarekê Ebû Qebelî yê Minbicî de zî rayberîya Têgêrayîşê Ciwanan ê Şorişgêran ê Sûrîye û Yewîya Cinîyan ê Ciwanan de hêrişê vera Eyn Îsayî bi rayraşîyayîşêk ameyî protestokerdene. Dima eşkerayîye ameye wenden û bêvengîya komelê mîyanneteweyî ameye şermezarkerdene.

Eşkerayîye de selam ame kerdene xoverdayîşê QSDyî zî.

Hemserekê Meclîsê Rayberdişê Îdareyê Sivîlî Mihemed Xêr Şêxoyî qiseykerdişê xo de ard ziwan ke ganî komelo mîyanneteweyî wezîfeyê xo bîyaro ca.

Hemşaredarê Ebû Qelqelî Rîya Elavîyî zî îfade kerd ke ê hêrişê vera erdê Rojawanî şermezar kenê.