Endamo Ronayox ê Îdareyê Komalgehê Demokratîkî û Azadî yê Rojhelatê Kurdîstanî (KODAR) û Partîya Cuya Azade ya Kurdîstanî (PJAK) Rêzan Cawîdî (Yûsif Rebani) û şerwanê YPGyî Dijwar Kobanê vizêr Şehîdgehê Şehîd Dijwarî yê dewa Dawûdîye yê Hesekê de bi merasîmêkê xurtî ameyî definkerdene.

Hêrişê dewleta tirke yê vera Qamişloyî de 6ê tebaxe de Rêzan Cawîd û 10ê tebaxe de Dijwar Kobanê şehîd bibî. Cenazayê wird şehîdan verê banê Meclîsê Keyeyanê Şehîdan ê Hesekê ra pê konveyêka bi vilikan xemilîyayî ra ameyî girewtene. Cenazeyî bi sloganan ameyî berdene Şehîdgehê Şehîd Dijwarî yê dewa Dawûdîye.

Şehîdgeh de badê rêzgirewtişî hetê şerwananê YAT, QSD, YPJ û YPGyî ra merasîmo leşkerî ame kerdene. Vervatoxê YPGyî Nurî Mehmudî ke merasîm de qisey kerd vat: ''Şehîdan şarê herême qirkerdişî ra pawit. Hesabê nê hêrişan do miheqeq bêro persayene.'' Endama Komîteya Hemserekîye ya PDYî Fozo Yusif zî vat: ''Îşxalkerî se kenê wa bikerê do ser mekewê. Îradeyo azad do ser bikewo. Ganî şarê ma vera hêrişê dewleta tirke û xeta îxanetî tewrê sefanê hêzanê leşkerîyan bibo.''  Hemserekê PYDyî Salih Muslim zî ard ziwan ke ê do heta peynî şarê herême bipawê û heta serkewtişî têkoşînê xo bidomnê.

Dayîka Şehîd Lolo Hisênî Selma Mihemed zî verê tewrbîyayoxan de tifing kerd berz û soz da ke a do vera hêrişan têkoşîn bikero û cayê hêzanê leşkerîyan ca bigêro.

Badê qiseykerdişan cenazayî bi sloganan ameyî definkerdene.