Bado ke dewleta tirka îşxalkere 8 nuqtayê çimdarî yê xo yê Îdlîbî veng kerdî, hêrişê vera Eyn Îsayî zêdînayî.

Rûsya rojanê ravêteyan de QSDyî ra waştbi ke wa Eyn Îsa dewrê rejîmê Sûrîye bikerê la no waştişê înan ame redkerdene. Badê nayî QSD, Rûsya û rejîmê Sûrîye pêvînayîş kerd û di yê înan rojawanê bajarî de yew zî rojhilatê ci de hîrê nuqtayê çimdarî ameyî ronayene. Nê nuqtayan de leşkerê rûsan, hêzê QSDyî û fermandarê rejîmê Sûrîye manenê .

Dewleta tirke û çetayanê ci vizêr serê sibayî hêrişê Eyn îsayî kerd. Saetanê şewe de rixmo ke hêrişê çînêbi hesabanê çeteyan, medyaya tirke û çimeyanê Rûsya û rejîmî îdîa kerd ke di dewê Eyn îsayî ameyî îşxalkerdene. Baldaro ke sereyê progaganda Rûsya û rejîmî ant.

Dima ra serê sibayî hêrişê vera Eyn Îsayî dest pêkerd. Hêzanê QSDyî cewabê hêrişan de û heta şan dewanê Mişrefa, Celbê û Seyda pêkewtişê giranî ciwîyayî. Rûsya û rejîmê Sûrîye ke herême de qerarqeh û nuqtayê çimdarî yê înan estê, têna pêkewtişê giranî û hedefgirewtişê sîvîlan seyr kerd. Nê hêrşan de xeylêk kesî birîndar bîyî û dewa Mişerfê de di kesî binê enqazî de mendî. Pêkewtişan de tewr tay 10 çeteyî ameyî kiştene.

Eyn Îsa cayo ke stratejîk o ke herêmanê Kobanê-Reqa, Kobanê-Cizîrê û Minbic-Cizîrê yewbînan rê girê dano. Vizêr şan reyna xeta Zirgan û Minbicî de têgêrayîşê leşkerî estbi. Dewleta tirke û çeteyanê ci Zirganî rê sewqîyato leşkerî kerd û Minbiç sero zî topî varnayî.

Hemsereka Meclîsê Sûrîyeya Demokatîke (MSD) Emîne Omera ke derehqê hêrişan de eşkerayîye daye, hêrişan ra Rûsya berpirsîyar tepişt û ard ziwan ke Rûsya seba ke bajarî teslîmê hukmatî Şamî bikero, QSDyî rê zext kena.

Verê hêrişan Endamê Komîteya Werêardişê Neteweyî yê Hukmatê Sûrîye Omer Rahmûnî hesabê xo yê medyaya sosyale de  ''Oxir bo Eyn Îsa'' pare kerd û îma kerd ke Tirkîya û Rûsya  Eyn Îsa û Îdlîbî ser o bazarîye kenê. Seba ke Rûsya QSDyî rê zext keno ke Eyn Îsayî dewrê remîmî bikero û Tirkîya Îdlîb de nuqtayê xo yê çimdarî lezabeze veng kerdî nê benê sebebê persan.