Dewleta tirke ya îşxalkere dima de 9ê teşrîna verêne ya 2019î de hêrişê Girê Sipî, Serêkanîyê kerd awa Îstansyonê Elokî yê Kantonê Hesekê birnabî. Dewleta tirke 25 rojî yo ke reyna awa Îstasyonê Elokî birnaye ke no îstasyon Serêkanîyê ra awe beno pêro herême.

Îşxalê Serêkanîyê û Girê Sipî ra dima Rûsya û dewleta tirke pêkerd ke eke Îdareyo Xoser 20 mega ampet ceyran bido awe do nêra birnayene. La rixmê nê şertî zî dewleta tirke awa herême reyna sey çekêke xebitnaye.

Nêzdîyê 25 rojan ra nata qeza, tax, kuçe û dewanê Hesekê  û kampanê Hol, Erîşa û Waşokanî de mîlyonêk û 200 hezar merdimî bêawe mendî.

Îdareyo Xoser nê prosesê pandemî de xîret keno ke pê tankeran awe biresno hemwelatîyan.

Hemserekê Îdareyê Awe yê Kantonê Hesekê Mehmûdî derheqê mesele de ANFyî rê qisey kerd. Mehmûdî ard ziwan ke no kerdişê dewleta tirke sûcê şerî yo. Mehmûdî pare kerd ke înan derheqê mesele de welatanê garantoran Rûsya, Amerîka, Xaçê Sûrî, UNICEF û Neteweyanê Yewbîyayeyan reyde qisey kerd la nînan seba çareserîya mesele gamêke nêeşte.

Mehmûdî vat: ''Seba herêmanê rejîmê Şamî nê dezgehî cade têgêrenê. La wexto ke babete Rojawan biba nê çîyêk nêkenê. No zî mojneno ke na bire birêka sîyasî ya.''

Şaristanê Hesekê yê Rojawanî verî awa xo Çemê Xabûrî ragirewtêne la dima ke  dewleta tirke awa uca birnaye Îstasyonê Elokî amebi awankerdene. Îşxalê Serêkanîyê ra dima Îstasyonê Elokî zî kewt destê dewleta tirke.