Hemserekê Meclîsê Rayberdişî yê Herêma Firatî Mihemed Şahînî cewab da persanê ANFyî û derheqê hêrişanê vera Rojawanî û sîyasetê Sûrîye yê dewleta tirke de ANFyî rê qisey kerd.

 Hetêkî de hêrişê dewleta tirke yê vera Rojawanî dewam kenê, hetêkê bînî ra zî dewleta tirke Şam de pêvînayîşan kena. Dewleta tirke xîret kena ke çi bikera?

Nê rojan de tewirê dewleta tirke ya leşkerî û sîyasîye vurîyaye. Dewleta tirke xîretê xo yê îşxalî rê dewam kena. La seba ke îşxalî rê paştgîrî nêdîyî dewleta tirke stratejîyêka cîya ya hêrişî teqîb kena. Dewleta tirke hêrişê xo yê bi droneyê çekdarî (SÎHA) zêdînayî, bombardumanî zêdînayî. Dewleta tirke armancê xo yê awankerdişê rejîmê pabesteyê xo û awankerdişê cergan de bin kewte, yanî sîyasetê xo yê serê Sûrîye de bin kewte. Nika dewleta tirke peyê sîyasetêkê bînî yê bazirganîye de ya. Wazena îdareyê Şamî de têkilîyanê xo hol bikera.

Dewleta tirke wexto ke Îdareyê Şamî reyde qala dîyalogan kena, baregehanê ci yê leşkerîyan kena hedef; tewr peyên hêrişê vera Kobanê de leşkerê Şamî merdî. Cenabê to ney senî şirove keno?

Dewleta tirke wazena pê îtîfaqanê sîyasî û dîplomatîkan xurtêr bimojna. No metodê dewleta tirke yo. Her kes her çîyî vîneno. Xeyalê NeoOsmanîyan û îşxalê erdan ê dewleta tirke bin kewte. Dewleta tirke nika mîyanê krîzanê pîlan de ya. Qels a. Coka wazena pê pêvînayîşanê hukmatê Şamî cerganê xo çin bikera.

Rûsya tîya de çi rolî kay kena?

Destpêkî ra nata Rûsya mudaxeleyê îdareyê Şamî kerd. Îdareyê Şamî sey embazê xo yê stratejîkî vînena. Dîyalogê mabênê dewleta tirke û rejîmê Şamî pê teşwîqê Rûsya yenê kerdene. Xora Rûsya zî paştî dana nê xîretan. Aseno ke dewleta tirke seba asayîkerdişê têkilîyanê xo yê bi Îdareyê Şamî do cergan ra fek vera bida û xora hêrişê vera Rojawanî ra zî tawîz da.

Peymana Adana de qala ci yena kerdene ke 5 kîlometreyanê dûrê sînorî de operasyonî ancax bêrê kerdene la nika şertê 30 kîlometreyan yeno ferzkerdene. Gelo no do bêro qebulkerdene?

Peymana Adana sîyasî bîye û hedefê ci kurdî bîye. Nika newekerdişê ney seba dîzaykerdişê tasfîyeya Îdareyê Xoserî yo. Tîya de zî seba tesdîqê îdareyê Şamî dewleta tirke pêvînayîşan kena û coka cergan ra fek vera dana.