Hetkara Hemserekanê Îdareyê Xoserî yê Rojawanî Emîne Osê derheqê hêrişanê dewleta tirke yê vera herême ser o ANFyî rê qisey kerd.

Dewleta tirke tim hêrişê herêmanê Rojawanî kena. La menga peyêne de hêrişê xo kerdî giranêr. Çira?

Dewleta tirke bi destûrê hêzan ê mîyanneteweyîyan hêriş kena. Netîceya hêrişanê vera Girê Sipî û Serêkanîyê de bi hezaran merdiman koç kerd. Êyê ke herême nêtirknaye her roje benê hedefê hêrişan. Verê Îdareyê Xoserî de di rewşê girîngî estbî; vîrusê Korona û hêrişê dewleta tirke. Prosesanê Astana û Cenevre ra dima weçanayîşanê Amerîka ra semed yew vengîye virazîyaye. Dewleta tirke na vengîye xebitnaye û hêrişê xo kerdî giranêr. Hêrişê vera Eyn Îsayî zî na çarçewe de yê.

Garantoranê peymana adirbirnayîşî ra yew zî Rûsya ya. Hêzê Rûsya û Sûrîye serrêke zêdêr herême de yê la vera hêrişan bêveng ê. Çira?

Eke dewleta tirke Rûsya ra destûr nêgirewtêne nêeşkayêne hêriş bikera. Xora Rûsya zî terefgîra rejîmê Şamî ya. Seba ke Tirkîya Îdlîbî ra xo apey bigêra Rûsya destûr dana ci ke hêrişê herêman bikera.

Girîngîyêka taybete ya Eyn Îsayî esta?

Eyn Îsa hetê cografîkî ra girîng a. Dewleta tirke bi Efrîn dest pê îşxalanê xo kerd û dima zî hêrişê Girê Sipî-Eyn Îsayî kerd. Dewleta tirke wazena xeta Eyn Îsa-Girê Sipî de herêmanê Cizîre-Firatî yewbînan ra cîya bikera. Coka hêrişê vera Eyn Îsayî cidî yê. Dewleta tirke hetêkî ra wazena derbe bida statuyê Rojawanî hetêkê bînî ra zî wazena Başûr de mîyanê kurdan şer bida destpêkerdene.

Îdareyê Sûrîye se keno?

O zî teqez bi destûrê Rûsya hêriş keno. Rejîmê Sûrîye bi teda wazeno ma ra tawîzan bigêro.

Gelo şima pabeyê hêrişêkê hîna pîlî yê?

Dewleta tirke wazena vengîyêka sîyasî ra îstîfade bikera û tewirê hêzan ê mîyanneteweyîyan biercna. Rûsya û rejîm bêveng ê. Seke mi vat hêrişî palnkerde û cidî yê.

Îdareyo Xoser do se bikero? Şar eşkeno se bikero?

Vera hêrişan ma do şar, cofrafya û statuyê xo bipawê. Ma bi hawayêkê stratejîkî nêzdîyê prosesî benê û xîret kenê ke hewcedarîyanê şarê xo peyda bikerê. Îdareyê Xoserî ra berî Sûrîye de projeyêko çareserîye çin o. Xîretê ma yê dîplomatîkî û amadekarîyê ma yê pawitişî do dewam bikerê.