Par 6ê teşrîna verêne de Amerîka hêzê xo yê leşkerîyî Rojawanî ra tepîya girewtî û dewleta tirke zî 9ê teşrîna verêne de dest pê hêrişanê Girê Sipî û Serêkanîyê kerd. QSDyî vera artêşa tirke û cerganê El Nûsra, DAÎŞ û cerganê 'Artêşa Azade ya Sûrîye' xoverdayîşêko destanwarî kerd.

17ê teşrîna verêne ya 2019î de Amerîka û dewleta tirke 5 rojan adirbirnayîş îlan kerd. Dima zî Tirkîya û Rûsya 22ê teşrîna verêne de adirbirnayîşêk îlan kerd. 23ê teşrîna verêne de çarçewa peymane de hêzê Rûsya sînor de cabîyî. Verî QSDyî û rejîmê Sûrîye zî vera hêrişanê dewleta tirke pêkerd û hêzê rejîmî 15ê teşrîna verêne de Kobanê, Eyn Îsa û Girê Sipî de cabîyî. La rixmê hende pêkerdişan zî dewleta tirke hema zî hêrişê herême kena û Rûsya-Şam zî vera hêrişan bêveng ê.

Cayo stratejîk

Eyn Îsa bajarekê  qezaya Girê Sipî yê Reqa yo. Rayîrê Kobanê, Sirinê, Reqa, Minbic, Til Temirî û rayîrê M4î Eyn Îsayî ra derbaz benê. Rayîrê M4 zî Hesekê, Qamişlo û Til Koçerî pabesneno sînorê Iraqî.

QSDyî temmuza 2015î de Eyn  Îsa destê DAÎŞî ra xelisna. Seba ke Eyn Îsa nêzdîyê Reqa û Minbicî yo bîyo merkezê Koalîsyonê Mîyanneteweyî û merkezo sîyasî yê Îdareyê Xoserî yo. Kampa tewr pîle ya DAÎŞî zî Eyn Îsa de yo ke tede 9 hezar kesî manenê.

DAÎŞî ra dima bi hedefê dewleta tirke

Dewleta tirke 9ê teşrîna verêne ya 2019î de bi taybetî hêrişê Eyn Îsayî kerd. Wextê hêrişan de zafê endamê DAÎŞî kampan ra remayî û înan reyna çekî girewtî xo destî. Cergan ancî hêrişê şarê Rojawanî kerd. QSD û şarê Rojawanî 9 rojan vera hêrişanê dewleta tirke bi hawayêkê destanwarî xo ver da.

17ê teşrîna verêne ya 2019î de Amerîka û dewleta tirke 5 rojan adirbirnayîş îlan kerd. Dima zî Tirkîya û Rûsya 22ê teşrîna verêne de adirbirnayîşêk îlan kerd. 23ê teşrîna verêne de çarçewa peymane de hêzê Rûsya sînor de cabîyî. Verî QSDyî û rejîmê Sûrîye zî vera hêrişanê dewleta tirke pêkerd û hêzê rejîmî 15ê teşrîna verêne de Kobanê, Eyn Îsa û Girê Sipî de cabîyî. La rixmê hende pêkerdişan zî dewleta tirke hema zî hêrişê herême kena.

Bi taybetî merkezê Eyn Îsa zî tede dewê Hoşan, Xalidiyê, Ebû Sira û Mealekî yê Eyn Îsayî tim bîyî hedefê artêşa tirke û cerganê ci. Nê hêrişan de zaf zerar resa can û malê sivîlan ser. Sivîlan keyeyê xo teriknayî, bi desan sivîlî merdî û birîndar bîyî. Rixmê hende çîyan zî heta nika Rûsya û rejîmê Sûrîye vengê xo nêvet. Dewleta tirke rixmê peymanan zî sînoranê xo ra aver şîya û dewa Seyda de xo rê warêko leşkerî înşa kerd.

Rûsya û Baas çira bêveng ê?

Menga teşrîna peyêne ra heta nika dewleta tirke 35 reyî hêrişê Eyn Îsayî kerd. Nê hêrişan de sivîlê bi nameyê Mehmûd Zêd El Zêd (3), Minbel Ahmed El Abid (22), Mihedîn Hejî (35) birîndar bîyî û mal û mulkê sivîlan zî talan bîyî.

Medyaya Baasî (rejîmê Şamî) wina propaganda kena ke Rûsya Eyn Îsa do bida rejîmê Baasî. Goreyê îdîayan Rûsya QSDyî ra vat ke Eyn Îsa teslîmê Sûrîye bikero û herême ra vejîyo. Rûsyaya ke bi serran dewleta tirke vera QSD û Îdareyê Xoserî sey çekêke xebitnayî, seba ka Sûrîye rê waran abikera wazena QSD pasîf bikera.

Pêvînayîşanê QSD û Rûsya yê 6ê teşrîna verêne ser o QSD û rejîmê Şamî pîya Eyn Îsa de 3 noqtayê çimdarîye ronayî. Rûsya bi nê noqtayan wazena bimojna ke 'a vera hêrişanê Tirkîya tedbîran gêna.' La cara Rûsya zî rejîmê Şamî zî serrêke ra nata warê Eyn Îsa de yê û vera pêro hêrişan tim bêveng mendî. Roniştoxanê herême zî vera Rûsya û rejîmê Baasî nêrazîbîyayîşê xo mojnayî. Rûsya bi nê hawayî armanc kerd ke verê nêrazîbîyayîşan bigêra.