Rojawan de serrêke ra nata seba caardişê yewîya neteweyîye pêvînayîşî yenê kerdene. Endama Konseya Hemserekîya PYDyî Foza Yûsif derheqê pêvînayîşanê yewîya kurdan ê Rojawanî de ANFyî rê qisy kerd.

Foza Yûsif da zanayene ke nika pêvînayîşî vindertî û vat: ''Sebebê vindertişî yo verên tewirê ENKSî yo. Ma armanc kenê ke pêro terefê sîyasî yî tewrê pêvînayîşan bibê. La ENKS sey modelê Başûrî wazeno Rojawan di parçe bibo. La Rojawan û Başûrê Kurdîstanî seyci nîyê. Tirkîya dewaya kurdan înkar kena û Rojawan îşxal kena la ENKS Tirkîya reyde têgêreno. ENKS kiştoxanê Hevrîne Xelef reyde cergan reyde fotografan gêbo. Nê têgêrayîşê ENKSî xetanê ma yê sûran binpay kenê, hesasîyetê ma peygoş kenê. Tay sebebê vindartişê pêvînayîşan wina yê. Sebebo bîn zî no yo ke ENKS şertanê winasênan ano ma ver ke ma nêeşkenê nê şertan qebul bikerê. Qet yew perro sîyasî zî nêeşkenê bi sereyê xo nê şertan qebul bikero.''

Foza vîst vîrî ke nê wextan de reyna hêrişê dewleta tirke û cerganê ci Eyn Îsa, Til Temir, Şehba, Efrîn, Serêkaniyê û Girê Spî de zêdîyayî. Foza Yûsif vat: ''Ne Amerîka ne zî Rûsya adirbirnayîş teqîb nêkenê. No zî hêrişanê dewleta tirke ra zemînêk amade keno. Cergê Sûrîye sey DAÎŞ ê û ganî nê cergî bêrê feshkerdene.''

Foza Yûsif derheqê têkilîyanê bi Şamî de zî wina vat: ''Rejîmê Sûrîye polîtîkaya 'çaresernêkerdişî' ano ca û na rewşe zî meseleyan kena giranêr. ''

Foza Yûsif peynîya qiseykerdişê xo de bale ante peymana PDK-Bexdadî ya serê Şingalî ser û vat: ''Ma xo Şingalî ra mesuldar vînenê. Xora deynê pêro kurdan o ke wayîrê Şingalî vejîyê. Nika ra pey bi rayîranê dîplomatîk û sîyasîyan ma do hetê Şingalî de bibê. Çunke no seba pêro kurdan wezîfeyo neteweyî yo.''