Hemserekê Daîreyê Tekîlîyanê Teberî yê Îdareyê Xoserî yê Rojawanî Abdulkerîm Omerî derheqê hêrişê çeteyanê DAÎŞî yê vera zîndanê Hesekê de ANFyî rê qisey kerd.

Omerî ard vîrî ke nê hêrişî ne verên û ne zî peyênî û vat: ''Seba ke hêzê mîyanneteweyî berpirsîyarîya xo nêanê ca nê hêrişî yenê kerdene. Raşta ya ma herême de estbîyayîşê leşkerî yê DAÎŞî pîya bi Baxozî qedîna la terorê DAÎŞî nêqedîya. Serkewtiş leşkerî bi.  DAÎŞ hema estbîyayîşê xo domneno. Hucreyê rakewteyî tim hêriş kenê. Herême ke bi serran binê kontrolê DAÎŞî de mendî de hema îdeolojîya DAÎŞî esta. Reyna zîndan de û kampan de çeteyê DAÎŞî tim hêrişî rê amade yê.''

Omerî ard ziwan ke semedê qedînayîşê terorî ganî herême de îstîkrar bibo û vat: ''Hêriş û ablûqayê vera herême verê hêrişanê DAÎŞî akenê. Bitaybetî qefilnayîşê berê sînorî yê Til Koçer û Sêmalka rewşa ekonomî ya herême xirabe kerde û DAÎŞ nê sey firset şuxulnena û xo newe ra ana pêser. Hêrişê dewleta tirke yê vera herême DAÎŞî newe ra ganî kenê.''

Abdulkerim Omerî vat: ''Bi deshezaran çeteyî kampan û zîndanan de yê. Ma xeylêk rey veng da rayapêroyîya mîyanneteweyîye û derheqê rewşe de hîşyar kerd.  Ganî semedê problemê DAÎŞî  rayapêroyîye û koalîsyonê mîyanneteweyî berpirsîyarîya xo bîyaro ca. Ganî her welat bêro tîya ra hemwelatîyanê xo bêro. Êyê ke nêeşkenê bêrî zî wa hetkarîya ma bikerî û çeteyî bêrê muhakemekerdene. Ganî semedê caardişê hewcedarîyan asayîşê kampan û zîndanan paştî bidîyo Îdareyê Xoserî. Zîndanê Xiwêranî verî dibistan bi. Cayo sey dibistan de tepiştişê bi hezaran çeteyan tehlukeyî pîlêr keno.''