Dewleta tirke ya îşxalkere vizêr taxa Hilêlîye ya bajarê Qamişloyî yê Rojawanî de pê Wesayîtanê Hewayî yê Bêmerdiman û Çekdaran (SÎHA) wesayîtêk da bombayan ver. Netîceya hêrişî de Keyeyê Guloyî ra hîrê kesî şehîd bîyî.

Ewro Qamişlo de vera hêrişanê dewleta tirke rayraşîyayîşêk ame kerdene. Keyeyê Guloyî zî tewrê çalakîye bi. Rayaşîyayîş de hêrişê dewleta tirke û xayînîye ameyî şermezarkerdene û mesajê wayîrvejîyayîşê xoverdayîşê şehîdan ameyî dayene. Rayraşîyayîş Meydanê Şehîd Xabatî de verê xeyma tezîye de qedîya.

Badê rêzgirewtişê semedê şehîdan bi nameyê Meclîsê Keyeyanê Şehîdan ê Cizîre Hesen Ubêdî qisey kerd. Hesen Ubêdî bale ante fedakarîya şehîdan ser û vat: ''Keyeyê Guloyî keyeyêko fedakar ê Kurdîstanî yo. Xeyrê şehîdan û şervanan planê leyminî yê dewleta tirke pûç ameyî vatene. Şexsê Şehîd Yusif Guloyî ma heme şehîdanê xo yad kenê û soz danê ke ma do têkoşînê înan bidomnê û îşxalkeran erdê xo ra vejê.''

Bi nameyê Keyeyê Guloyî Rêzan Guloyî zî vat: ''Ma do bi qerardar têkoşînê xo bidomnê û Kurdîstanî azad bikerê. Şehîd Yusif Guloyî gama ke Rayber Apo nas kerd têkoşîn de aktîf ca girewt û tim vatene o do heta nefesê xo yê peyênî têkoşîn bikero, wina zî kerd. Ma zî soz danê şehîdanê xo ke heta caardişê waştişanê înan ma do bi felsefeya Rayber Apoyî xover bidê.''