Rûsya û Tirkîya yê ke goreyê menfaatanê xo wazenê şeklêk bidê Rojawan û Sûrîye xîret kenê ke pê madeya 2254. ya Konseya Asayîşî ya Neteweyanê Yewbîyayeyan pêvînayîşê Cenevre bêtesîr bikerê.

18ê kanûna 2015î de Konseya Asayîşî ya Neteweyanê Yewbîyayeyan (KANY) qanûno 2254. qebul kerd. Qanûno 2254. vano ke ''Mîyanê 6 mengan de ganî hukmato demkî, biasayîş û xosero ke pabesteyê qet yew mezheb nîyo bêro ronayene û mîyanê 18 mengan de zî weçînayîşê edîl û xoserî binê çimdarîya Neteweyan ê Yewbîyayeyan (NY) de bêrê kerdene.

Goreyê tay pisporan hêzê sey Rûsya û Tirkîya paştîya xo danê nê qanûnî û herême de wazenê xo rê meşrûtîye awan bikerê.

Endamê Merkezê Cigêrayîşan ê Stratejîkan ê Firatî Welîd Çolîyî  babete ANFyî rê ercnaye.

Welîd Çolîyî pare kerd ke bi waştişê 'hukmatê demkîyî' meseleya Sûrîye meseleya mîyanneteweyîye ra vurîyena meseleya herêmkî. Çolîyî vat: ''Tirkîya û Rûsya xîret kenê ke rayaumûmîya mîyanneteweyîye û Cenevre bixapînê. Eke no qanûn bêro caardene rejîmê Şamî û endamê Îhvanî do daxîlê îqtîdarî bibê. Tewirê YE û Amerîka do rewşe eşkera bikerê.''

Serekê ForumêKurd-Almanan Yûnis Behramî zî îfade kerd ke Rûsya û Tirkîya komîteya qanûnê bingeyî ser o kayan kay kenê û vat: ''Muxalefetê Sûrîye dima ke merkezê xo hewilna Îstanbul xo teslîmê destê tirkan kerd. Dima zî destkewteyê şorişî bîyî meseleyê bazirganîye. Tirkîya Sûrîye de peyê di armancan de ya; çîyêk nêkewo destê kuran û terefgîrê Îhvanî daxîlê rejîmê Sûrîye bibê.''

Komîteya Qanûnê Bingeyî yê Sûrîye çeleyê 2018î de Kongreya Dîyalogan ê Neteweyîyan a Sûrîye de visîyaye rojdem. Na komîteya ke awanîya ci hetê Îran, Tirkîya û Rûsya ra ameye kifşkerdene teşrîna verêne ya 2019î de pê hêzê madeya 2254. ya NYyî Cenevre de ameye pêser.

150 endamê komîte estê. Nînan ra 50 tenî hetê hukmatê Sûrîye ra, 50 tenî hetê grubanê muxalefetî ra û 50 tenî zî hetê NYyî ra weçînîyayî. Komîteya qije ya viraştişê qanûnê bingeyî de zî her yew terefî ra 15 tenî bi temamî 45 kesî estê.

Temsîlkarê Rojawano ke nufusê ci 5 mîlyon o, komîte de ca nêgênê. Coka temsîlkaranê Rojawanî dabi zanayene ke ê do goreyê biranê komîte tênêgêrê.