Merkezê Çapemenîya QSDyî bi eşkerayîyêke da zanayene ke hêrişê dewleta tirke û çeteyanê ci yê vera Eyn Îsayî de 5 embazê înan şehîd bîyî.

Eşkerayîye de ame vatene ke dewleta tirke û çeteyanê ci hêrişê xo yê vera Eyn Îsayî zêdînayî vat şerwananê QSDyî cewabê înan da û xeylêk hêrişî peyser qeldayî. QSDyî da zanayene ke 27ê kanûne de hêrişê vera dewanê Mişêrfa û Cehbelî yê Eyn Îsayî de pêkewtişê giranî ciwîyayî û netîceya pêkewtişanê 27 û 28î de 5 şerwanê înan şehîd bîyî. QSDyî keyeyanê şehîdan rê serweşîye waşte û sozê pawitişê herra xo newe kerd.