Rojawan de bi hezaran kesî Dêrik û Girkê Legê de vejîyayî meydanan û înan peymana Bexdad-Hewlêrî ya serê Şingalî şermezar kerde.

Dêrik

Şarê Dêrikî rayberîya Partîyanê Yewîya Niştimanî ya Kurdan (PYNK) de bi şîarê 'Birakujî rê ney, wext wextê yewîya neteweyî yo' peymana serê Şingalî bi çalakîya rayraşîyayîşî protesto kerdî.

Çalakîye de PYNKyî ser o Îbrahîm Ebdîyî qisey kerd û ard ziwan ke ganî xoserîya Şingalî rê paştî bêra dayene.

Girkê Legê

Girkê Legê de zî bi hezaran kesî seba şermezarkerdişê peymane vejîyayî meydanan. Çalakîya rayraşîyayîşî de mamostaya kurdkî Şehnaze Mistefa eşkerayîye wende.

Şehnaze venga hukmatanê Bexdad û Hewlêrî da ke peymane ca nêarê û vat: ''Ganî her peymane bingeyê îdare û îradeyê Şingalî ser o biba.''

Çalakîya rayraşîyayîşî bi sloganan qedîyaye.