Serra 2020î de îşxalê Girê Sipî û Serêkanîyê ra dima hêrişanê konvensîyonel û îdeolojîkan ê vera Rojawanî dewam kerd. Xoverdayîşê vera nê hêrişan zî bi heman hawayî dewam kerd.

Serra 2020î ya Rojawanê Kurdîstanî bi kilmî wina derbaz bîye:

Yewîya neteweyîye

Mabênê partîyan ê kurdan ê Rojawanî û ENKSî de bi înîsîyatîfê QSDyî û mabênçîya Amerîka û Fransa pêvînayîşanê yewîye serrêke dewam kerd. 19ê gulane de 25 partîyanê Partîya Yewîya Neteweyî ya Kurdan (PYNK) awan kerde. PYNK û ENKSî 17ê hezîrane de Qamişlo de eşkerayîyêka hempare daye û da zanayene ke înan madeyanê peymana Dihokî ya 2014î ser o pêkerd.

Xebatê dîplomatîkî

Temsîlkaranê Rojawanî xeylêk welatanê Rojhelatê Mîyanênî de û 8 welatanê Ewropa de temsîlkarîya xo naye ro. Swêd, Belçîka, Fransa, DYA, Avusturya, Anrbavut, Fînlandîya, Ozbekîstan û Tacîkîstanî ra xeylêk heyetan Rojawan zîyaret kerd. 31ê tebaxe de MSD û Partîya Îradeyê Şarî ya Sûrîye Moskoba de mutabaqetêk îmza kerd.

Qanûnê Sezarî 17ê hezîrane de hetê Amerîka ra ame caardene. Qanûnî ra dima erjê lîraya Sûrîye kêmîya. Qanûn vera rejîmê Sûrîye amebi kerdene.

Pêvînayîşê seba qanûnê bingeyî

Serra 2020î de zî meseleya Sûrîye-Rojawanî ser o mabênê xeylêk welatanê sey dewleta tirke, Îngilîstan, Amerîka, Fransa ûsn de xeylêk pêvînayîşî ameyî kerdene. La meseleyî nêameyî çareserkerdene.

Komîteya Qanûnê Bineyî ya ke pêvînayîşanê Rûsya, Îran û dewleta tirke ra dima ronîyaye Îdareyo Xoser teber de verda. Komîte heta nika 3 kombîyayîşî kerdî. Dewleta tirke pêvînayîşan de şertê 'hukmarê demkî' ferz kena.

Meseleya Îdlîbî

Dima ke dewleta tirke kewte Îdlîb Rûsya da piro û bi desan leşkerê tirkî kiştî. Mabênê Tirkîya û Rûsya de adirbirnayîşêk ame îmzakerdene û artêşa tirke 8 noqtayan ra xo apey girewt. La hema zî herême de 60 baregehê artêşa tirke estê.

Sûîkastê vera rayberanê eşîran

Cerganê dewleta tirke hêrişê rayberanê eşîranê ke paştî danê Îdareyê Xoserî kerd û xeylêk raynerî bi rayîrê sûîkastan qetil kerdî.

Vurnayîşê demografîya herême

Dewleta tirke serra 2020î de zî Efrîn, Cerablûs, Bab, Ezaz, Serêkaniyê û Girê Spî de xebatê vurnayîşê demografî dewam kerdî. Cergan dest na mal û mulkê herêmîyan ser.

Efrîn de 2020 de 805 cinîyî ameyî remnayene, 54 cinîyî kişîyayî. Bi seyan merdimî zî seba fîdye hetê cergan ra ameyî remnayene û bi îşkence kişîyayî. Keye û darê Efrînî ameyî talankerdene.

Îşxalê dewleta tirke dewam keno

Dewleta tirke ya îşxalkere cerganê xo reyde vera Şehba, Minbic, Eyn Îsa, Kobanê, Til Temir, Zirgan û Dêrikî hêrişanê xo dewam kena. Nê hêrişan de heta nika sivîl û domanî ameyî qetilkerdene.

HRE zî hetêkî ra çalakîyanê xo dewam kena. Goreyê bîlançoya çalakîyanê HRE 302 cergî kişîyayî û 300 cerg û leşkerî zî birîndar bîyî.

Têgêrayîşê QSDyî yê vera DAÎŞî

QSDyî operasyonê vera hucreyanê DAÎŞî dewam kerdî. Çarçewa operasyonan de 179 cergê şikdarî yê DAÎŞî ameyî destbendkerdene.

Propagandayê PDKyî

PDKyî xîret kerd ke bi rayîrê ENKSî şoriş çin bikero  û dewleta tirke hêrişê Rojawanî bikera. Selahîyetdaranê PDKyî îdîa kerd ke paştdayîşê seba QSDyî şino PKK û YPGyî hêrişê pêşmergeyan kerd. YPGyî îdîa red kerde.

Dewleta tirke awa herême birnaye

Dewleta tirke çend reyan awa Îstasyonê Elokî birnaye ke awa ci şina pêro herême. Dewleta tirke mîlyonêk û 200 hezar merdimî bêawe verdayî. Mengêke ra nata awa îstasyonî birîyaye.

Rojawan de tesîrê Korona

Menga adare de Îdareyê Xoserî yê Rojawanî çarçewa tedbîranê vîrusê Korona de qedexeyê tebervejîyayîşî îlan kerd. Rojawan de heta nika 8 hezar kesî pê vîrusî kewtî û 270 kesî zî vîrusê Korona ra merdî.