Hêrişê hêzanê PDKyî yê vera gerîlayanê HPGyî herêma Sêmalka ya Rojawanî de ame şermezarkerdene.

Keyeyê gerîlayan ê Rojawanî  bi slogana ''Wa biciwîyo xoverdayîşê gerîlayan, bimiro xayînîye'' sînor de çalakîye kerde. Çalakwananê ke pankarta vera xayînîye û posterê Rayberê Şarê Kurdî Abdullah Ocalanî kiriştî xoverdayîşê Ocalanî û gerîlayan selam kerd û bi slogananê xo erd û asmên zimnayî.

Xece Ebdullaha ke tewrê çalakîye bîye vat: ''Wazenê gerîlayan, kurdan qir bikerê. Nê zî pê destê kurdan kenê. Ma coka ewro tîya yê. Kam ke vera xoverdayîşê gerîlayan vejîyo şarê kurdî rê xayînîye keno. Ma do heta peynî peyê paştîya gerîlayan de bê.''

Xalîmê Hiseyîna efrînije zî vat: ''Domanê ma semedê Kurdîstanî mucadele kenê. Êyê ke vera Kurdîstanî yê wazenê ke kurdan biverdê yewbînan û mabenê ci  de şer vejê. Ganî her kes nê plananê leyminan vîno û vera nayî hîsgêr bo.''