Kampa Holî qezaya Holî ya Hesekê de hetê Komîserîya Berze ya Multecîyan a Neteweyanê Yewbîyayeyan ra 1991 de ameye awankerdene. 2003 de dima ke Amerîka mudaxeleyê Iraqî kerd kampe bîye wargehê iraqijan. Kampe 2015 de kewte binê kontrolê Hêzanê Sûrîyeya Demokratîke (QSD). Adara 2009î de keleya peyêne ya DAÎŞî Baxoz ame xelisnayene û bi nê hawayî keyeyê cerganê DAÎŞî Kampa Holî de ameyî cakerdene. Nufusê kampe 4 qatî zêdîya.

Kampa Holî sey 'kampa tewr tehlukeyîne' ya dinya şinasîyena. Kampe de Iraq, Sûriye, Ozbekistan, Azerbaycan, Tirkiye, Tirkmenistan, Kirgizistan, Çeçenistan, Tirkistan, Endonezya, Rûsya, Elmanya, Belçîka, Norwêc, Hollanda, Fînlandiya, Misir, Fas, Cezayîr, Tûnisî reyde hemwelatîyê 50 welatan, qasê 67 hezar kesî manenê.

Kampa Holî seba DAÎŞî û paştgîranê ci bîye armancêk ke tede newe ra awan bibê. DAÎŞî bi lezî xo verda mîyanê kampe, dest pê înfazan kerd û ferman da ke endamanê xo yê kampe reyde hukmê DAÎŞî dewam bikerê. Dima cerganê DAÎŞî kampe de dest pê rêxistinîya hucreyanê nimiteyan kerd. Bi nê hawayî waşt ke kampe bikerê 'Merkezê Xîlafetê DAÎŞî.' Cergan xîret kerd ke kampe de rêxistinîya 'El Hîsbe' newe ra bi rêxistin bikerê. Rêxistinîya 'Cîhadîstî' zî kampe de perwerdeyê nimiteyî kerdêne, mehkemeyî ronayêne û înfazî kerdêne.

Fermanî hetê Îstîxbaratê tirkan ra yenê

Cerganê ke hetê Hêzanê Asayîşê Zereyî ra tepişîyayê, îtîrad kerd ke înan seba kiştiş û îşkenceyî herêmanê binê îşxalê dewleta tirke ra ferman girewtêne. Îtîrafan de ke ma 23ê hezîrana 2021î de weşanaybî, eşkera bi ke fermanê Kampa Holî hetê sercerg Cerrag Ebû Omerî ra dîyayêne ke hetê MÎTî ra kampe ra amebi remnayene. Mersûl Samî Mûhammed Necîmo ke Sey 'Ebû Velîdî' şinasîyeno, Selam Samî Mûhammed, Husam Tala Feryad û Mervan Halîd Duleymî operasyonê QSDyî yê vera kampe de tepişîyayî û înan îtîraf kerd ke seba hêrişanê kampe endamanê îstîxbaratê tirkan ra fermanî girewtêne. Wezîfeyê remnayîşê cerganê DAÎŞî û keyeyanê înan Kampa Holî de dîya Weqfa Hetkarîya Merdimîye (ÎHH) ke na weqfe pê têkilîyanê xo yê bi MÎTî zanîyena. 

Barê cergan QSD û Îdareyê Xoserî rê verdîyayî

Îdareyê Xoserî û selahîyetdaranê QSDyî venga welatanê ke cergî hemwelatîyê înan ê, da ke bê muhakemekerdişî tepiştişê hende cergan tehlukeyêko pîl o. Îdareyê Xoserî û QSDyî nê welatan ra waşt ke wa mehkemeyêka mîyanneteweyîye bêra ronayene. Naye ser o karêko dîplomatîk o girîng ame kerdene. Labelê na babete de hema zî gamêke nêerzîyaye.

Safhaya verêne ya Operasyonî

Serkêşîya Hêzanê Asayîşê Zereyî de, bi beşdarîya QSD, YPG û YPJyî 28ê adara 2021î de kampa Holî de vera hucreyanê nimiteyan ê DAÎŞî 'Operasyonê Asayîşî û Merdimîye' dîyabi destpêkerdene. Netîce de bi desan hucreyê DAÎŞî ameyî çinkerdene û sercergî zî tede 300 cergê DAÎŞî tepişîyayî.

Dima înan senî xo rêxistin kerd?

DAÎŞo ke serra 2021î operasyonê Kampa Holî de derbê giranî werdbî, reyna xo verda mîyanê kampe û cergê xo yê pasîfî vistî mîyanê têgêrayîşî. 20ê çeleyê 2022yî de hêrişê vera Zîndanê Sînaa reyde kampe de newe ra têgêrayîşê DAÎŞî dest pêkerd.  Hêzanê Asayîşê Zereyî key no ferq kerd cade têgêrayî. Seba kempa çekî kamca ra ameyêne? Netîceya karê hemparî yê MÎT, OSO û hucreyanê DAÎŞî de çekî bi rayîrê depo û tankeranê awe erşawîyenê kampe.

Safhaya diyîne ya operasyonî

Fermandarîya Pêroyî ya Hêzanê Asayîşê Zereyî ya Rojawanî 25ê tebaxa 2022yî de pare kerd ke seba ke Kampa Holî gefanê DAÎŞî ra bêra xelisnayene înan dafhaya diyîne ya 'Operasyonê Asayîşî û Merdimîye' daya destpêkerdene. Fermandarîye dîyar kerd ke Kampa Holî vurîyaya merkezê hucre û keyeyanê DAÎŞî û pare kerd ke kampe de emser 43 hêrişê terorîstî ameyî kerdene, nê hêrişan de 14ê ci cinîyî 44 kesî ameyî qetilkerdene.