Fermandarê Pêroyî yê Meclîsê Leşkerî yê Girê Sipî Rîyad El Xelefî ANHA rê qisey kerd û vat ke hêzanê înan vizêr şan cewabê xîretanê artêşa tirke ya îşxalkere û cerganê ci da.

El Xelefî pare kerd ke pêro xeber û agahîyê ke vanê Rûsya reyde peymanêke ameye kerdene, raşt nîyê û vat: ''6 hewteyan ra dima hêrişê giranî yê dewleta tirke rixmê noqtayanê kontrolî sey verî yê.''

Rejîmê Şamî qaşo vera 'hêrişanê dewleta tirke' tay noqtayê kontrolî viraştbî la Rûsya û rejîm hema zî vera hêrişan bêveng ê.  Verê baregehê Rûsya yê Eyn Îsayî de roniştoxî çalakîyan kenê  la Rûsya reyna zî tewirê xo nêmojnena.