Dewa Osmandedeyî yA qezaya Bazarcixî ya Mereşî de xesarê erdlerzî zaf gird o. Hema hema bano bêxesar, pêt nêmendo.  Dewijî kenê ke pê îmkananê xo biciwîyê.

Keyeyê Alî Denîz Uzatmazî yo ke Qirkerdişê Garî yê Anqara de dinyaya xo bedilnaye, na dewe de yo.  Apê Alî Denîzî, Yilmaz Uzatmazî qala birarzayê xo û rewşa erdlerzî kerd.

Yilma Uzatmazî vat: ''Badê Alî Denîzî têkoşînê ma dewam kerd. Êz pê bawer a ke sereyê ey pê ma berz o.  Çunke ma zî pê sereberz bî, sereberz ê. Dejê ey tim zerrîya ma de yo. Çi heyf nika yewna dej est o. Dewa ma erdlerz de serûbin bîye. Merdimê ma merdî. Îqtîdar wayîrê şarî nêvejîya. Hewteyêk dimayê erdlerzî zî hema xeyme û malzemeyê germbîyayîşê yê xeylêk kesan çînêbi. Ma rê kesanê sîvîlan hetkarî kerde. Ma pêro kesan rê spas kenê ke ma rê destê hetkarî derg kerd. Dewlete qet hetkarî nêkerde. Tîya hetê ma pêro dewê elewîyan ê. Ez vana çoka înan hetkarî nêkerde. Ma elewîyê tirkmenan ê la dormeyê ma pêro dewê kurdan ê. Mabênê elewîyan ê kurdan û tirkan de problem çîn o. Xora her kes ma zano; ma de merdim merdim o. Ma merdiman  goreyê bawerî, reng, nasname û ziwanê ci cîya nêkenê. Kabeyê ma merdim o. Hukmat şaran cîya keno. Dewa ke cîrana ma ya, ma ûca binê xirban ra cenazayî pê destanê xo vetî. Qet ekîbêkê cigêrayîş û xelisnayîşî nêame.''