Îtîfaqê Kede û Azadîye metnê xo yê tewir û mutebeqatî Anqara de bi kombîyayîşêkî eşkera kerd. Hemvervatoxê Partîya Çep a Keske Îbrahîm Akin, Hemserekê HDPyî Mîthat Sancar, Serekê TÎPî Erkan Baş, Serekê Partîya Têgêrayîşê Kedkarî (EHP) Hakan Ozturk, Federasyonê Meclîsanê Sosyalîstan ra Bariş Kayioglu, TOPî ra Perîhane Koca û Serekê EMEPî Ercument Akdenîz zî tewrê kombîyayîşî bîyî.

Îbrahîm Akinî metnê tewir û mutebeqatî yê weçînayîşî eşkera kerd. Akinî îfade kerd ke înan 22yê adare de derheqê weçînayîşê serekkomarîyende metnê xo yê tewir û mutebeqatî eşkera kerdbî û oyo ewroyîn zî metnê serê weçînayîşanê wekîlan o.  Akinî ard ziwan ke weçînayîşanê wekîlan de zî hedefê înan o verên çinkerdişê rejîmê tekperestî yo.

Akinî da zanayene ke EHP, EMEP, HDP, SMF û TOP 81 şaristanan de Partîya Çep a Keske reyde do bikewê weçînayîşî la TÎP 49 şaristanan û 52 dormeyê weçînayîşî de bi sereyê xo do bikewo weçînayîşî.

Akinî mutebeqatê îtîfaqî wina dîyar kerd: ''Pêro herêmê weçînayîşî ameyî cigêrayene, serkewtişê weçînayîşanê HDPyî yê verênî ameyî esaskerdene û yew  hedefê serkewtişî ame dîyarkerdene. Ma armanc kenê ke bi mutebeqatê xo yê weçînayîşî, kampanyayêka xurte bikerê. Bi na bira xo ma hêvî kenê  ke Îtîfaqê Kede û Azadîye weçînayîşan de do ser bikewo û rejîmê tekperestî bin bivisno. Pêro cinî, kedkar, ciwan û şarê ma rê bixêr bo. Ma do pîya ser bikewê. Şarê ma do ser bikewê.''