Colemêrg de Partîya Çep a Keske armanc kena ke hîrê wekîlîyan zî bigêra.  Hemserekê HDPyî yê qezaya Şemzînanî Yunus Ozkoyuncuyî derheqê xebatanê weçînayîşî de qisey kerd.

Ozkoyuncuyî pare kerd ke weçînayîşê 14ê gulane do bibê weçînayîşê fînalî û vat: ''Wa her kes pê wijdanê xo têbigêro ke ma nê zulm û ezîyetî ra bixelisê. Ma hêvîdar ê. Şarê kurdî cewabê xo do 14ê gulane de bido.''

Ozkoyuncuyî îfade kerd ke înan zaf verî dest pê xebatanê xo yê weçînayîşî kerdo û vat: ''Pêro embazê ma bi kedêka pîle xebitîyenê. Embazanê ma û îdareyî her ca de komîsyonî nayî ro. Şarê ma hînî wazeno weçînayîşan ra pey nefesî bigêro. 14ê gulane de ma do na dîktatorîye birijnê. Ma heta peynî hetê şarê xo de yê. Qet yew kay pê ma nêeşkeno. Ma şarê xo ra wazenê ke 14ê gulane de wa wayîrê rayanê xo vejîyo. Wa her kes şoro serê sibdoqan û seba haştîye û azadîye raya xo bido.''