Erdlerzî ra dima RTUKî cezayê pere û vindernayîşê weşanî dayî kanalanê TELE1, Fox TV, Halk TVyî û medyaya kurdî zî medyaya dijîtale de ameye astengkerdene. Parlamanera HDPyî Şevîne Coşkun ard ziwan ke nê hewldayîşê îqtîdarî yê nimnayîşê rastîyan ê. Îqtîdar çend hewl bido zî do nêeşkîyo vernîya rastîyan bigîro.

Binpayankerdişê heqê cuye

Şevîne Coşkun dîyar kerd ke erdlerzî ra dima astengkerdişê medyaya dîjîtale binpayankerdişê heqê cuy o û vat, ‘‘Seke erdlerzê 6ê sibate de zî ame vînayene, îqtîdar key bitengijyo dest bi nimitişê rastîyan keno, heqê şar o ke zanayîşan bigîro. Halbûkî erdelrzî de astengkerdişê înternetî binpayankerdişê heqê cuye  yo. Kesê ke binê xirban de yê heta ke şarjê înan biqedîyo eşkenê xo biresnê wezîfedaran ke xebere bidê.’’

Se bikerê zî nêeşkenê rastîye binimnê

Şevîne Coşkûn wina dewam kerd, ‘‘Prosesê erdlerzî de her kesî dî ke îqtîdar nêeşkeno karê xo bikero. Çapemenîya ke rastîye şarî rê vila kena, çi heyf ke reyna bîyî hedefê îqtîdarî. Kanalê muxalîfan û sewbîna rojnameyanê kurdî Xwebûn, Ajansê Mezopotamya û Jinnews zî mîyan de 340 sazgehê çapemenîye ameyê astengkerdene. Halê îqtîdarî hende xirab vejîyayo meydan ke hewdayîşê ey ê nimnayîşî zî pere nêkenê.

Rastîyî do bêrê eşkerakerdene

‘‘Bêguman eşkera yo ke qanûnê sansûrî seba dergkerdişê emxê îqtîdarî  yo. Çunke verê weçînayîşî hewcedarîya îqtîdarî bi zuran est a ke nêrê eşkerakerdene. Nimûneyêk, Efê Îmarê ke bî sebebê hende felaketan, awanîyî ke qeraxe û hêgayan mîyan ra virazîyayî rijîyayî û îqtîdar wazeno nînan binimno. Yewna nimûne, serebûdê Îstîklalî bî ke reyna îqtîdar nêwaşt şar zanayîşan bigîro û hewl da ke rastîyan binimno. Bi qanûnê sansûrî wazeno rastîyan binimno. Se bibo zî rastîyî do bêrê eşkerakerdene.’’