Baroyê Amedî semedê serekê xo Tahîr Elçîyî yo ke 28ê teşrîna peyêna 2015î de verê Mînareya Çalinge de ame kiştene, aktîvîteya vîrardişî organîze kerde.

Cinîya Elçî, Turkane Elçî, Hemserekê HDPyî Mîthat Sancar, Hemserekê KCDyî  Bedran Ozturk, Hemsereka DBPyî Salîha Aydenîze, Serekê Baroyê Amedî Cîhan Aydin û îdarkarê ci, Hemserekê OHDyî Bunyamin Şeker, temsîlkarê ÎHD, Odayê Tabîban,TMMOB, KESK, baroyanê Riha, Wan û Şirnexî zî tede xeylêk kesî verê edlîye de ameyî têhet. Grube pê pankarta Ma do to xo vîrî ra mekerê ver bi Mînareya Çarlinge rayra şîyî.

Grube bi deyîra Dîyarbekir ya Amet Kayayî ya resayî verê Mînareya Çarlinge. Tîya bi nameyê baroyî Cîhan Aydinî eşkerayîye daye.

Aydinî vat: ''5 serrî yo ke ma gêrenê qetilkaranê Tahîr Elçîyî ke bi bi zirxê bêcezayîye yo qalinî yenê pawitene. Ma 218 hewteyî verê Edlîyeya Amedî de semedê caardişê edaletî çalakîyî kerdî. Dima ke dewa ameye akerdene ma mabên da ci. Roniştişo verên de ame vînayene ke polîtîkaya bêcezayîya ke wextê cipêrsayîşî de ameye rayraberdene, mehkeme de zî dewam kena. Ma do vera na neheqîye têkoşînî rê dewam bikerê.''

Ayninî vist vîrî ke badê vefatê Tahîr Elçîyî welat bineyna bi tarî zilmat û vat: ''Yeno waştene ke heme komel bêro hepskerdene. Nê welatî de hinî qet asayîşê huqûqî yê hemwelatîyêk çîn o. 80 mîlyon kesî şikdar ê. Her serê sibayî ma bi xebaran destbendkerdiş û tepiştişî dest pê roje kenê. Hukm vera îşkence, mergê teberê qanûnî, qirkerdişê cinîyan, îstîsmarê domanan,qirkerdişê dormeyî bêveng o.''

Aydinî bale ante ser ke rewşa meseleya kurdî zî wextê Tahîr Elçîyî ra xirabêr a û vat: ''Mesele asayîş û burokrasîya ci rê ameya verdayene. Polîtîkaya bêçareyîye gangirewti û ganvêşnayîşî rê dewam kena. Azadîya îfade û çapemenîye binê tehdîtê giranî de ya. Zîndanî rîyê fîkanê înan ra pê sîyasetmedar, temsîlkarê dezgehanê sîvîlan û rojnamegeran ameyî pîrrkerdene. Her serre bi desan tepişteyê nêweşê ke nêameyî tedawîkerdene cenazayê înan zîndanan ra yenê vetene.''

Aydinî vera hêrişê serê avûkatan zî nêrazîbîyayîşê xo ard ziwan û vat: ''Sereko sînaye badê to halê welatî wina yo la wa çimê to dimayê to de memanê  bi hezeran hemmeslegê to qerardar têkoşînê edalet û heqanê merdiman rayra benê. Xeyalê to yê cuyeya azade, xeyalê ma yo zî.''