Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser 53 rojî yo Baroyê Amedî de Nobeta Edaletî tepişenî. Dezgehê Amedî tim çalakwanan zîyaret kenê. Rixmê naye hetê dezgehanê dewlete ra hema gamêke nêameye eştene.

Nobetdaran ra Feyzîye Kolakana ke ANFyî rê qisey kerd vat lajêkê ci Bandirma û bîn zî Girê Sor de yo. Kolakane vat: ''Wextê janî ra nata ez nêşina qay domananê xo. Veyvê mi şîyênî. Seba ke veyvê mi reyêke panc deqeyan ra zafêr pêvînayîş kerd aye rê qedexeyê pêvînayîşî dîya. Nika ez şina zîyaretê lajê xo û vînena ke lajê min o ke Gir Sor de rewşa ci hole nîya. Xeylêk wexto ma Baro de çalakîye kenê.  Ganî huqûqnasî, baroyî û dewlete rewşa domananê ma rê çare bivînê. hema ke cenazayê tepitşeyanê nêweşan nêameyî ganî çare bêro vînayene.''

Kolakane bale ante ser ke tay tepişteyî 30 serrî yo zîndan de yê û vat: Ne yew roşnayîye vînenî ne zî yew werdo hole wenê. Verî ma werd berdenê, nika o zî qedexe kerd. Tim erzenê koguşan înan ser û cigêrayîş kenê. Tepiteyan rê îşkence kenê. Rixmo ke pêvînayîşê akerdeyî nêbenê her hewte cigêrayîş kenê. Xora zere de yê qey cigêrayîş kenê?''

Kolakane veng da merdimanê tepişteyan û vat: ''Ganî dayîkê tepişteyan tewrê çalakîya ma bê. Ganî paştî bidê çalakîya ma û semedê azadîya domananê xo têkoşîn bikerê. Domanê ma zîndanan de helisîyenê. Ganî ma semedê înan çîyêk bikerê. Wa huqûqnasî bêrê paştî bidê ma. Domanê ma semedê heq û huqûqê ma pêrune zîndan de yê. Çîyêko xirab nêkerdo. Ganî ma çîyêk bikerê, wayîrê heqanê tepişteyan vejîyê.''