Bado ke Serekê Baroyê Amedî Nahît Eren û keyeyê ci medyaya sanale de ameyî tehdîtkerdene, hesabê bi nameyê @arifdogan1923 Serekê Baroyê Çewlîgî Omer Faruk Hulaku û keyeyê ci pê mergî tehdît kerdî.

Omer Faruk Hulakuyî ke Ajansê Mezopotamya rê qisey kerd, tehdîtê ke têdima benê sey polîtîkaya tersnayîş û çokdayîşî hesibnayî û vat: ''Vîjnayîş nêzdî beno. Îhtîmalo pîl o ke coka zext kenê. Sebebo tewr pîl ê na rewşe bêcezayîye ya. Dewlete Ewropa de zî adresî ÎPî yê kesanê parkerdiş kenê vînena la ê ke ma tehdît kenê, înan nêvînena. Beno ke hema serekê baroyanê bînan ê herême zî bêrê tehdîtkerdene. Ganî tedbîrî bêrê girewtene. Seba ke nê kesê ke tehdîtan kenê nînê cezakerdene, ê zî dahîna cesaret genê.''

Omer Faruk Hulakuyî vat o do roja dişemeyî derheqê hesabê eleqedarî de pêhesnayîşê sûcî bikero.

Hetê bînî ra Yewîya Baroyanê Tirkîya (TBB) û serekanê 81 baroyan derheqê tehdîtanê vera Omer Faruk Hulakuyî de eşkerayîye daye. Eşkerayîye de seba ke verê tehdîtan nîno girewtene nêrazîbîyayîş ame mojnayene û paştî dîyaye Hulakuyî.