Qezaya Kerboranî yê Mêrdînî  serranê 2015-2016î de wextê xoverdayîşê xoîdarekerdişî de xeylêk domanî hetê tîmanê taybetan ra ameyî destbendkerdene û tepiştene. Nînan ra Kadrî Sancaro ke o wext 17 serre bi 2015î ra nata  Zîndanê  Şakranî de yo û cezaya 22 serran dîyaye ci.

Birayê Kadrî Sancarî, Îslam Sancarî derheqê bêhuqûqîya ke birayê ci rê bîya de  ANFyî rê qisey kerd.

Sancarî vat: ''Birayê mi û embazê ci wextê pêkewtişî de semedê xo pawitişî şîyî yew keye ke no keye ê domanan ra yê xala yewî bi. Roja peyêne ya qedexeyî de yewî gerreyê keyeyî kerd û tîmanê taybetî eşt  keyeyî ser û domanê ke serrê înan sey 15-16- 17 bî, ê b îşkencekerdişî destbend kedî. Domanê ke yew menge zîndanê Mîdyatî de mendî îşkenceyanê giranan ra ravêrtî. Gama ke badê mengan ma ê zîyaret kerdî hema bendenê înan de rêçê îşkenceyî estbî. Dima ra sewqê Zîndanê Domanan û Ciwanan ê Şakranî bîyî. Wextê surgunkerdişî de zî vêşan û têşan ameyî verdayene û tengayî pîl antê.''

Sacarî ard ziwan ke înan avûkatêk tepişt la o zaf eleqedar nêbi û înan xeylêk wext nêresayî avûkatî û vat: ''Ma dima ra eşnawitê ke avûkat merdo. Xora rewşa ma ya madî hole nêya. Pereyo ke ma dabi nê avûkatî ma nêşkayî peyser bigîrê.''

Bira Sancar pê îmkananê xo seba ke birayê ci Kadrî nêweşo û nêno tedawîkerdene rewşa ey fîneno rojdem. Dima ra  xeyrê Wekîlê HDPyî  Omer Faruk Gergerlîogluyî reseno avûkate Çîgdeme Koça ke nika dewaya înan teqîp kena.

Keye tim nêeşkeno şiro lajê xo bivîno. Dadî û babîyê ci 2015î ra nata têna di rey lajê xo dîyo. Sancarî vat: ''Ma  hem  nêeşkenê heqê rayîrî bidê hem zî jan kewt mabên. Birayê mi hema doman bi erzîya zîndan û domanîya ci uca şîye. Nika pê na ceza ciwanîya zî do uca biqedîyo.''

Avukata keyeyî Çigdeme Koça ka dewa badê qerarê Mehkemeya Berze girewte nika semedê muracatê Mehkemeya Qanûnê Bingeyî amadekarîye kena. Avukate Koçe bale ante ser ke domanan qet rîyê dadgerî nêdîyo û vat: ''Na sey vakaya Îlhan Çomakî ya.  27 serrî verî ya dewa de çîyêkî bîyî ewro tîya reyna benê.  Bê ke rî bi rî bêrê muhakemekerene cezaya 22 serran dîyayî domanan. Dewa de qet delîlo qetî çîn o. Xora ciwanan îxlalkerdişê konutî ra ceza girewta. Rixmo ke keyeyo ke tede mendî yê xala domanan ra yewî yo û cinîyêke zî gerreyê domanan nêkena ceza ameya dayene. Nê kesî xora hela ke ameyî tepiştene doman bî û goreyê nayî nêameyî muhakemekerdene.''