Paytextê Almanya Berlin de hetê Federasyonê Komeleyanê Elewîyanê Demokratîkan (FEDA) ra şewa Reya Heqî ameye organîzekerdene.

Şewe pê Gulbangî dest pê kerde. Pîr Alîyî bale ante muhîmîya yewîye û pîyayîye ser. Hunermende Sevgî Yurtsever zî semedê pawitişî ziwanî qisey kerd.

Hemserekê FEDA Demîr Çelîk zî bale ante kayanê leyminan ke heta ewro Reya Heqî ser o ameyî kaykerdene ser û vat: ''Des rojî verî wekîlêkê AKPyî ameyo tîya vano 'kam ke Erdoganî qebul nêkeno û heqanê xo wazeno ma Tirkîya de qetil kerdî, ma do Ewropa de zî qetil bikero.' Pê kam yew heqî ma qetil kenê? Ez vana ziwanê mi ziwanê Xizirî yo, ez wayîrê ziwanê Xizirî vejîyena; o zî mi rê vano ti terorîst ê! Mi çew nêmirna. Şima tim mirnenê. Kam çekanê kîmyewîyan şuxulneno? Hetê bînî ra dewlete qirkerdişê fîzîkî û kulturkî kena.  Wazena kurdan ê elewîyan biqedîno. Inkey weçînitiş bîyo nizdî. Wird îtîfaq zî sey yewbînan ê. Elewî, cinî, demokrasî, heq û edaletî nêşinasnenê. Ziwanê kurdan, bawerîya elewîyan, cigêrayîşê heq û huqûqî yê kedkaran qedexe yo. Îtîfaqê Kede û Azadîye ke HDP û dostê ci tede ca genê, wazeno ke her kes bi ziwan, fîkr û bawerîya xo pîya biciwîyo. Ganî ma wayîrê nînan bivejîyê. Ganî ma sey wayûbirayan wayîrê yewbînan bivejîyê.''

Akademîsyen Kenan Engîn zî derheqê elewîtîye û barkerdişî de qisey kerd. Hunermend Yilmaz Yildiz û Soner Soyerî zî şewa Reya Heqî de deyîşî vatî.