Serekwekîla Koma HDPyî Merale Daniş Beştaş ANFyî rê zîyaretê Amedî yê Serekkomar Erdoganî ercna.

Beştaşe ard ziwan ke Erdogan bi şîyayîşê Amedî ramojna ke o reyna reyanê kurdan wazeno û vat: ''Zano ke nê heme qewimîyayîşan ra dima bê reyanê kurdan o nêeşkeno îqtîdarê xo bidomno û eke vîjnayîş bibo o do vînî bikero. No zîyaret eynî wextî de xebata vîjnayîşî bi. Îqtîdar goreyê şertanê xo beno ke dahîna rew vîjnayîş bikero.''

Beştaşe vist vîrî ke Erdoganî qiseykerdişê Amedî de HDP sey berpirsîyarê qedînayîşê prosesê çareserî ramojnayo û vat: ''Na bêsamîmîyetîye ya. Nika partîya ma rîyê mabênçîya demê çareserî ra yena muhakemekerdene. Hetêkî ra serekkomê nê welatî ke serekê pêroyî yê partîya îqtîdarî yo wayîrê prosesê çareserî vejîyeno hetê bînî ra partîya ma seba ke nê prosesî de rol girewto yena sûcdarkerdene. Îdrîs Baluken û Selahattîn Demîrtaş ê ke heyetê Îmraliyî de ca girewtêne hema zîndan de yê. Hem ti vanê  ke peyê nê prosesî de yê, hem zî rîyê nayî ra partîya ma rê dewaya qefilnayîşî yena akerdene. Nê senî do îzah bikerê?''

Beştaşe bale ante hêrişê îqtîdarî yê vera kurdan û HDPyî ser û vat: ''Hem neheqîye bikerê hem zî reyan biwazê. Narey têne bê HDP û bê Abdullah Ocalanî nê eynî wextî de bê kurdan yew çareserî wazenê. Çareserîya ke ê wazenê de kurdî çîn ê. Qey? Çunke hema ziwanê kurdan qedexe yo, kurdî hema seba ke kurdkî deyîran vanê ya zî kurdkî xutbe wanenê yenê tepiştene. Her roje dişmenîya vera kurdan zêdîyena. Coka bê kurdan, bê HDP û bê Abdullah Ocalanî yew çareserî wazenê. Yanî bê muxatabî cehd kenê ke xeyalê çareserî teqdîm bikerê. Xora çîyo winayên çew/e qebul nêkeno.''

Beştaşe muhîmîya rolê kurdan ê semedê vîjnayîşî vist vîrî û vat: ''Hinî pêro zanê ke bê reyanê kurdan çew nêeşkeno bibo îqtîdar. Amed de wayîrvejîyayîşê prosesê çareserî semedê waştişê reyanê kurdan bi. Eke raşta wazenê wa gamêke bierze, ganî verî tecrîdê Îmrali bêro wedaritene. Muxatabê çareserî Abdullah Ocalan o. Wa verê tecrîdê serê ey bêro wedaritene. Reyna hemserekî, wekîlî û heme sîyasetmedarê ma yê ke sey rehîn yenê tepiştene wa bêrê veradayene. Ganî qeyûmê şaredarîyan peyser bêrê antene. Yanî heta ke ê pratîk de game meerzê çew nê vatişan rê îtîbar nêkeno. Şarê kurdî hinî qale nê pratîk wazeno.''