Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser Amed û Nobeta Edaletî tepişenî. Nobete roja 67. de rixmê serd û sipirî dewam kena.

Nobetdaran ra Reşahate Ada ard ziwan ke têkoşînê înan do heta serkewtişî dewam bikero. Ada vat: ''Birayê mi Hamdusena yo ke keye de sey Rodî yeno zanayene 11 serrî yo zîndan de yo. Neweşîyê sey velke û qelbî yê birayê mi estê û eke mero veradayene do rewşa ci bibo giranêr.''

Ada wina qala birayê xo kerd: ''Birayê keyeyêkê welatperwerî de bi pîl. Ma wextê pîrik û pîrkalanê xo ra tim semedê ciwîyayîşê ziwan û kulturê xo têkoşîn kenê. Birayê mi zî sey ferdêkê keyeyî wayîrê ercanê xo vejîya ke bedelê naye dano. Ma rojekê gama ke ma veyve ra agêrayêne birayê mi ame tepiştene. Birayê mi kesê ko zanaye yo, wayîrê wîjdanî yo qiymet dano merdiman.  Çirey qelbê ma çewî nêşiknayo. Hem kedkarêk bi hem zî dewaya xo rê girêdaye bi.''

Ada wina dewam kerd: ''Bado ke dewlete banê ma yê dewe vêşna ma mecbur mendî ameyî bajar. Serran ra dima babî û dadîya mi peyser agêrayî û ez miqat çar wayûbirayanê xo bîya. Rodî 11 serrî yo zîndan de yo. Ez zî senî ke pîya bi ey zîndan de bî. Rîyê janê Korna ra di serrî yo ma pêvînayîşê akerdeyî nêkenê. Nê demî de zextî zî zafêr bîyî.

Birayê mi çar serrî Rîze de mend. Nê serran de ey rê zaf zext ame kerdene. Xora ma wexto ke şîyênî pêvînayîş ma zî raştê heqeretê personelanê zîndanî û şarê Rize ameyêne. Rojêke zaf serd bi tay mend ke ma bicemidîyê. Ma malayî ra waşt ke berê camî ma rê abikero la ey vat têna eke cenaza bibo o berî akeno. Gama ke ma kurdkî qisey kerdêne senî ke ma gule pano, ê sey dişmenî ewnîyayêne ma ra. Yew way û di birayê eynî demî de zîndan de bî. Hela ke ma dejê înan antêne birayêkê mi gama ke mase tepiştêne awe de fatisya. Dewlete destûr nêda wayubirayê mi yê ke zîndan de tewrê cenaza bibê. Ma zaf dejî antî. Bi serran  yew linga mi Rîze yew Îstanbul de bî reyna Amed de zî mi pêvînayîş kerdêne. Ê se kenê wa bikerê ma do xover bidê, milê xo çewt nêkerê.''