Kenan Yildizerler sey bi seyan ciwanan vengdayîşê Federasyonê Komeleyanê Ciwanan ê Sosyalîstan (SGDF) ser o ver bi Pirsûsî kewt rayîr ke xo biresno Kobanê. Yildizerler Qirkerdişê Pirsûsî de birîndar bi. Yildizerlerî serrgêra 6. ya Qirkerdişê Pirsûsî de ANFyî rê qisey kerd.

Yildizerlerî da zanayene ke rayîrê Pirsûsî de polîsan ê vindarnayî, çend reyî testê GBTyî kerdî la verê Pirsûsî de ê lez derbaz bîyî. Yildizerlerî vat: ''Ma Merkezê Kulturî yê Amara de bapeyê embazan bîyêne ke şîbî selahîyetdaran de qisey bikerê. Mi Hatîce Ezgî Saadet verî uca de şinasnaye. Embazan var verî ma do eşkerayîye bidê çapemenîye. Ma kom bîyî. Verî ez warê mîyanênî de bîya, dima ez derbazê warê pankarte bîye. O çax teqayîş qewimîya. Têmîyanîye bîyî, boya şewatî ameyêne. Her ca de cesedê parçebîyayeyî estbîyî. Tay embazê ma merdî tay embazê ma zî birîndar bîyî. Mi xîret kerdêne ke embazan bera salone. Mi di embazî berdî, reya hîrêyîne de ez pê hesîyaya ke linga min a çepe mîyanê gonîye de ya û ez birîndar bîya.''

Yildizerlerî pare kerd ke dewaya qirkerdişî de têna vergumanêk ame muhakemekerdene û vat: ''Dozger û mehkemeyî binê tesîrê îqtîdarî de yê. Dewaya ma nêna netîcekerdene. Versûc 6 serrî yo pê rayîrê SEGBÎSî tewrê mehkeme beno. Keye û dostê şehîdanê Pirsûsî edalet wazenê. 6 serrî nê 106 serrî zî derbaz bibê ma do seba Pirsûsî û seba her kesî edaletî biwazê. Bêguman a roje do bêra.''