Wekîlê verênî yê HDPyî derheqê prosesê weçînayîşan de ANFyî rê tay ercnayîşî kerdî.

Lezgîn Botanî vist vîrî ke serra 2015î ra nata rejîmê AKP-MHPyî Rojawan, Başûr û Vakurê Kurdîstanî de hêrişê kurdan keno, sîstemê mafya û cergan nano ro û beno sebebê krîzan. Botanî vat: ''Coka nê weçînayîşî seba kurdan û Rojhelatê Mîyanênî zaf krîtîk ê. Dewleta tirke nê serran de bedelê na şerperestîye da û kewta mîyanê krîzêkê ekonomîkî yê pîlî. Nê weçînayîşan de eke na dîktatorîye û cepheyê şerperestan reyna ser bikewê felaketî do bizêdîyê. La eke na dîktatorîye weçînayîşan de şora seba kurdan demokrasî agêrena. Kurdî nika prosesêkê qirkerdişî ra derbaz benê û tim raştê hêrişanê dewlete û nîjadperestan yenê ke ma maçê Bursaspor-Amedsporî de no çi dî.

Nê îqtîdarî estbîyayîşê xo çinkerdişê kurdan û bêstatuverdayîşê kurdan ser o nayo ro. La bedelê nê şerê vera kurdan şaranê Tirkîya zî da. Nika şarê Tirkîya vêşan ê û welat teslîmê mafya û çeteyan bîyo. Yanî nê weçînayîşî teyna qederê kurdan nê, qederê tirkan zî do dîyar bikerê. Ma hê serra 100. ya Lozanî de yê. Yanî ma noqtaya têrîameyîşî de yê. Eke kurdî nê weçînayîşan de temsîlkarîyêka hîra bivisnê destî û parlamento de bihêzêr bibê, hînî çew do nêeşko înan çin bihesibno. Ewro kurdan de yew hişmendîya yewîya neteweyîye virazîyaya. Ma na hişmendîye Şingal de zî Kobanê de zî dîye. Coka ez venga kurdan dana ke wa bêhêvî nêbê la yew bibê.

Ganî nê prosesî de pêro têgêrayîş, rêxistin û partîyê kurdan yew bibê û pîya heqanê xo biwazê. Vakurê Kurdîstanî parçeyê Kurdîstanî yo tewr pîl o. Qewimîyayîşê Vakurî tesîrê parçeyanê bînan zî keno. Naye ra Vakur çi bivisno destî kurdê bînî zî do bivisnê destî. Ez venga şarê Vakurê Kurdîstanî dana ke nê rejîmê faşîstî û qirkerî 14ê gulane de bişawê binê sindoqan. Wa 14ê gulane bibo wesîleya haştîye, demokrasî, azadîye û edaletî.''