Parlamenterê HDPyî Kemal Bulbulî vera polîtîkayanê vengkerdiş û asîmîlasyonî yê dewleta tirke yê vera herêmanê erdlerzî hêrsê xo ard ziwan û vat, ‘‘Felaketa esase AKP yo, gere şar ameyoxê xo rê wayîr bivejîyo’’
Parlamenterê HDPyî yê Antalya Kemal Bulbulî derheqê koçkerdişê herême de ANFyî rê qisey kerd.
Bulbulî ard ziwan ke, seba ke banê înan rijîyayo yan zî xesar girewto, şar meçbûr maneno ke koç bikero. La no gere no nêro a mane ke şar reyna nêagêro welatê xo û wina vat, ‘‘Gere tedbîrî bêrê girewtene. Gere şar agêro waranê xo. Dewlete zî nê çîyî plan kena, gere şarê ma haydar bibo. Rast o, tîya de problemê bingeyînî est ê. Setargeh, werd, pakîye, ûsn. Citkarê tutun û mişmişan binê xirban de mendê û heywanî zî binê xirban de mendê. Êdî problemêko vilakerdişê werdî ra girdêr est o. O zî koçkerdiş o.’’
Meyîtî binê xirban de est ê
Bulbulî vat, ‘Bi şertê ke reyna agêrê, eşkenê nika seba tedbîrî şêrê. Gere hukmat tespîtê xirbe û merdîyan bikero. Dewlete xirban sey siloyî nîşan dana la mîyanê xirban de xezîna est a. Asin, amûrê biqîmetî, zerrnî, û hema meyîtî binê xirban de yê. Coka gere merdim wayîrê înan bivejîyo.’’
Nêeşkenê rîyê muxalefetî ra biewne
Bulbulî dîyar kerd ke tay kesî peyda bîyê ke nê erdlerzî xo rê bikerê firsendêk û vat, ‘‘Ame tespîtkerdene ke 500 hezar kes koçê Mersînî kerdo. Koçê Îstanbul, Anqara û Îzmîrî zî kenê. Gelo ê bajaran ra hewcedarîyê şarî yenê dayene? Ney! Ma vajê Antalya da kîra 15 hezar a û mexdûro ke keyeyê ey rijîyayo senî eşkeno ê pereyî bido. Tay kesan keye û otelê xo pêşkeşê mexdûran kerdî la no her tim wina dewam nêkeno. Çunke mewsîmê truzmî dest pêkeno û do nê îmkanî vindî bibê. Vanê ke ma 110 hezar mîlyar arê dayo la ê do senî bixebitnê kes nêzano. Biewnê meclîsî zî nêakenê, çunke rîyê înan çin o ke muxalefetî ra biewnê.’’
Bulbulî dîyar kerd ke erdlerz felaket nîyo, felaketa esase AKP yo û vat, ‘‘Demê hukmatê AKPyî de laserî wirzîyayî, şewat virazîya, erdlerzî bîyê, krîzê ekonomîkî û şerî virazîyayê. Tena meteorêke menda ke nêginaya erdî ro. AKP bi xo felaketêk o. Gere AKP mezgê şarî ra pak bibo. Coka gere ma erdê xo cameverdê. Ma şirê zî gere ma peyser agêrê. Tîya vera kurd û elewîyan polîtîkayêka vengkerdiş û asîmîlasyonî yena rayraberdene. Ma wayîrê ameyoxê bivejîyê û paştîdayîşî girdêr xurt bikerê.’’
